قارا حالىقتى پايدالاناتىن دەلدالدارعا توسقاۋىل
2023 جىلعى 3 ناۋرىزدان باستاپ بانكروتتىق ءراسىمىن قولدانۋعا نيەت بىلدىرگەن ازاماتتاردان وتىنىشتەر قابىلداۋ باستالدى. ق ر قارجى مينيسترلىگىنىڭ مەملەكەتتىك كىرىستەر كوميتەتىنىڭ دەرەكتەرىنە سايكەس، كەيبىر حقو-لاردىڭ الدىندا اقشالاي سىيلىقاقى ءۇشىن قاجەتتى قۇجاتتار رەسىمدەپ بەرۋدى ۇسىناتىن «كومەكشىلەر» پايدا بولدى. مكك وكىلدەرى سوتتان تىس بانكروتتىق ءراسىمى (بەرەشەك 5،5 ملن تەڭگەدەن ارتىق بولماعان كەزدە) مۇلدەم تەگىن ەكەندىگى جونىندە ەسكە سالدى، دەپ حابارلايدى Almaty-akshamy.kz.
قارىز الۋشىلاردى الداۋ ءۇشىن «كومەكشىلەر» قانداي اڭىزدار ويلاپ تاباتىندارى جونىندە Fingramota.kz تالداپ كوردى.
«ءسىزدىڭ سوتتان تىس بانكروتتىق ءراسىمى بويىنشا قارىزدارىڭىزدى دەلدالسىز ەسەپتەن شىعارمايدى»
قاسكۇنەمدەر سوتتان تىس بانكروتتىق راسىمىنە ءوتىنىش جازۋ جانە مەملەكەتتىك ورگاندارعا ۇسىنۋ بويىنشا ءوز قىزمەتتەرىن ۇسىنادى. ولار ازاماتتاردى وزدىگىنەن جازىلعان وتىنىشتەر ەشبىر جاعدايدا قارالمايدى دەپ سەندىرەدى.
بۇل جالعان تۇسىنىك! «قازاقستان رەسپۋبليكاسى ازاماتتارىنىڭ تولەم قابىلەتتىلىگىن قالپىنا كەلتىرۋ جانە بانكروتتىعى تۋرالى» زاڭعا سايكەس قازاقستاندىقتار سوتتان تىس بانكروتتىق راسىمىنە ءوتىنىشتى دەربەس جانە مۇلدەم تەگىن ۇسىنادى. ەڭ باستىسى، مىناداي تالاپتار ساقتالۋعا ءتيىس:
1. بانكتەر، ميكروقارجى ۇيىمدارى جانە كوللەكتورلىق اگەنتتىكتەر الدىنداعى بەرەشەك 1600 ايلىق ەسەپتىك كورسەتكىشتەن اسپاۋعا ءتيىس (2023 جىلعا – بۇل 5 ملن 520 مىڭ تەڭگە)؛
2. بورىشكەردىڭ اتىنا تىركەلگەن مۇلىكتىڭ، ونىڭ ىشىندە ورتاق مەنشىكتەگى مۇلىكتىڭ بولماۋى.
3. ءوتىنىش بەرىلگەن كۇنى قاتارىنان 12 اي ىشىندە كرەديتورلار مەن كوللەكتورلار الدىنداعى مىندەتتەمەلەردى وتەۋدىڭ بولماۋى.
4. مەرزىمى وتكەن بەرەشەك تۋىنداعان ساتتەن باستاپ 18 ايدان اسپايتىن مەرزىمدە كرەديتتىك شارت بويىنشا ورىندالماعان مىندەتتەمەلەردى رەتتەۋ نەمەسە ءوندىرىپ الۋ جونىندەگى راسىمنەن مىندەتتى تۇردە ءوتۋ.
ەگەر بورىشكەر ءوتىنىش بەرگەن كۇنگە ءوزىنىڭ بەرەشەگىن 5 جىلدان ارتىق وتەمەسە، وندا اتالعان بارلىق تالاپتار وعان قولدانىلمايدى.