«حالىق باتىرى» كورمەسى اشىلدى
3 ءساۋىر – حالىق باتىرى امانگەلدى يمانوۆتىڭ تۋعان كۇنى. وسىعان وراي قازاقستان رەسپۋبليكاسىنىڭ ۇلتتىق مۋزەيىندە باتىردىڭ تۋعانىنا 150 جىل تولۋىنا وراي «باتىردىڭ بيىك تۇلعاسى: تاريحى، زەرتتەلۋى، اقيقاتى» اتتى رەسپۋبليكالىق عىلىمي-تاجىريبەلىك كونفەرەنسيا ءوتتى، دەپ حابارلايدى Almaty-akshamy.kz.
مەرەيتويعا ارنالعان كونفەرەنسيانىڭ پلەنارلىق وتىرىسىندا مەملەكەت جانە قوعام قايراتكەرلەرى، بەلگىلى عالىمدار ءسوز الىپ، ۇلت-ازاتتىق كوتەرىلىستىڭ كوشباسشىلارىنا، سونىڭ ىشىندە ا.يمانوۆتىڭ تاريحي تۇلعاسىنا قاتىستى پايىمدارىن ورتاعا سالدى.
«1916 جىلعى ۇلت-ازاتتىق قوزعالىسقا قاتىسۋشىلاردى ەسكە الۋ - ەلدىڭ تاريحي دامۋىنىڭ كەز كەلگەن كەزەڭىندەگى ماڭىزدى ءۇردىس. ەل تاريحىن ايگىلى تۇلعالار ارقىلى زەردەلەۋ حالىق تاعدىرىنداعى اسا ماڭىزدى وزگەرىس بولىپ تانىلاتىن: اۋماقتار ءۇشىن كۇرەس، سىرتقى جاۋعا قارسى تۇرۋ، مەملەكەتتىڭ بوستاندىعى مەن تاۋەلسىزدىگىن قورعاۋ، ماڭىزدى ساياسي جانە مادەني جەتىستىكتەرمەن بايلانىستى. وسىنداي تۇلعالار قاتارىندا 1916 جىلعى ۇلت-ازاتتىق كوتەرىلىستىڭ باسشىلارىنىڭ ءبىرى، پاتشا اسكەرىنە قارسى كۇرەستىڭ بەلسەندى قاتىسۋشىسى امانگەلدى يمانوۆ بار. ءبىز بۇگىنگى عىلىمي جيىندا امانگەلدى باتىردىڭ ۇلت تاريحىنداعى تاعىلىمدى ورنى، ونىڭ كۇرەسكەرلىگى حالقىمىزدىڭ بىرلىگىن ساقتاۋعا ارنالعانى جونىندە عيبراتتى وي-تولعاۋلار مەن ءتۇيىندى تۇجىرىمدار ايتىلادى دەگەن ويدامىن»، - دەدى ق ر عىلىم جانە جوعارى ءبىلىم ۆيسە-مينيسترى تالعات ەشەنقۇلوۆ.
كونفەرەنسيا اياسىندا قوستاناي وبلىسى مۋزەيلەرىنىڭ قورىنان «حالىق باتىرى» اتتى كورمە سالتاناتتى تۇردە اشىلدى. كورمەدە تىل جۇمىستارىنا شاقىرۋ تۋرالى پاتشا جارلىعىنىڭ جاريالانۋىنا بايلانىستى ارحيۆ قۇجاتتارىنىڭ كوشىرمەلەرى مەن فوتوسۋرەتتەر، امانگەلدى يمانوۆتىڭ دومبىراسى، ا.يمانوۆتىڭ تۋىستارىنىڭ جەكە زاتتارى، ساربازداردىڭ قارۋ-جاراقتارى جانە قازاقستاننىڭ حالىق سۋرەتشىلەرىنىڭ تۋىندىلارى قويىلدى. كورمە قازاقستان رەسپۋبليكاسىنىڭ ۇلتتىق مۋزەيىندە 2023 جىلعى 3 ساۋىردەن 3 مامىرعا دەيىن جۇمىس ىستەيدى.
بۇگىن كەشكىسىن ە.راحمادييەۆ اتىنداعى استانا مەملەكەتتىك فيلارمونياسىنىڭ شىعارماشىلىق ۇجىمدارى «دالا داۋىلپازى» اتتى كونسەرتتىك باعدارلاما ۇسىنىپ وتىر.
جالپى، قوستاناي وبلىسىندا ا.يمانوۆتىڭ مەرەيتويىنا قاتىستى ارنايى ءىس-شارالار جوسپارى قابىلدانعان. قورىتىندى مەرەيتويلىق شارالار الداعى قىركۇيەك ايىندا امانگەلدى اۋدانىندا وتەدى دەپ جوسپارلانىپ وتىر.