بانكروت دەپ تانىلعان ازاماتتارعا تاعى قانداي شەكتەۋلەر بار؟
بۇل تۋرالى ق ر قارجى ءبىرىنشى ۆيسە-مينيسترى مارات سۇلتانعازييەۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بانكروت بولىپ تانىلعان تۇلعالاردىڭ بەرەشەكتەرى شەگەرىلگەنىمەن، ولارعا قاتىستى ءبىرقاتار شەكتەۋلەر دە بولاتىندىعىن اتاپ وتكىم كەلەدى. ياعني، بانكروت دەپ تانىلعاننان كەيىن ونىڭ سالدارىنا دا نازار اۋدارۋ قاجەت. زاڭ جوباسىندا بانكروت دەپ تانىلعان ازاماتتارعا 5 جىل بويى قارىزدار، نەسيەلەر الۋعا تىيىم كوزدەلگەن. سونىمەن قاتار ازامات 3 جىل بويى ەمدەلۋدى، جاقىن تۋىستارىن ەمدەلۋگە ەرتىپ ءجۇرۋدى نەمەسە جەرلەۋگە بارۋدى قوسپاعاندا، ەلدەن تىس جەرلەرگە شىعا المايدى»، - دەدى ول ورتالىق كوممۋنيكاسيالار قىزمەتىندەگى بريفينگ بارىسىندا.
ونىڭ اتاپ وتۋىنشە، ازاماتتار 7 جىلدان كەيىن عانا بانكروتتىقتى قايتا قولدانا الادى.
«سوندىقتان ازامات ءوزىن بانكروت دەپ جاريالاۋدان بۇرىن ىقتيمال سالدارى جانە ارى قاراي قانداي كوزدەر ەسەبىنەن ءومىر سۇرە الاتىنى تۋرالى ويلانۋ قاجەت. جالپى، بانكروتتىقتى قولدانۋ جەكە تۇلعالارعا بورىشتىق جۇكتەمەسىنەن قۇتىلۋعا جانە بەلسەندى ەكونوميكالىق قىزمەتىن جۇرگىزۋدى باستاۋعا مۇمكىندىك بەرەدى»، - دەدى مارات سۇلتانعازييەۆ.