4 قىركۇيەكتەن باستاپ قازاقستاندا بانكروت دەپ تانىلعان ازاماتتاردىڭ تىزىمدەرى جاريالانا باستادى.
ق ر قارجى مينيسترلىگى مەملەكەتتىك كىرىستەر كوميتەتىنىڭ مالىمەتى بويىنشا، ءقازىردىڭ وزىندە بەرەشەگى 435 ملن تەڭگەنى قۇرايتىن (كرەديتتىك بيۋرونىڭ مالىمەتى بويىنشا) 309 ادام بانكروت دەپ تانىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
اتالعان ازاماتتارعا 14-14 قىزمەتى بويىنشا sms-حابارلاما ارقىلى سوتتان تىس بانكروتتىق ءراسىمىنىڭ اياقتالعانى جانە بانكروت دەپ تانىلۋى تۋرالى حابارلاما كەلىپ ءتۇستى، سونداي-اق ولار تۋرالى اقپارات «e-gov» پورتالىندا ورنالاستىرىلدى.
بانكروت دەپ تانىلعان ازاماتتاردىڭ 22ء-سى مەملەكەتتىك اتاۋلى الەۋمەتتىك كومەك الۋشى بولسا، 232ء-سى بەس جىلدان استام نەسيە قارىزدارىن وتەي الماي جۇرگەندەر.
بانكروت دەپ تانىلعان تۇلعالاردىڭ ورتاشا جاسى 40 جاستى قۇرايدى. بۇگىندە بانكروتقا ۇشىراعانداردىڭ ەڭ جاسى 1 ميلليون تەڭگەدەن استام قارىزى بار قىزىلوردا وبلىسىنىڭ تۇرعىنى، ول 23 جاستا. ال ەڭ قارت بانكروت بولعان ازامات ماڭعىستاۋ وبلىسىنىڭ 65 جاستاعى تۇرعىنى بولدى، ونىڭ 3 ميلليون تەڭگەدەن استام قارىزى ەسەپتەن شىعارىلادى.
بۇل ازاماتتار اۋىر قارىزدان قۇتىلدى.
دەگەنمەن، بۇل ءراسىمنىڭ كەلەسى سالدارى بار – بەس جىل ىشىندە جاڭا نەسيە الۋعا تىيىم سالىنعان جانە مۇنداي ازاماتتاردىڭ ۇستىنەن ءۇش جىل بويى قارجىلىق مونيتورينگ جۇرگىزىلەدى.