كۇدىكتىنىڭ سەرىكتەستەرى ءارتۇرلى مەرزىمگە باس بوستاندىعىنان ايرىلدى.
قازاقستانداعى بانكتەردىڭ بىرىندە جالعان ەۋرو بانكنوتتارىن ايىرباستاپ، شەتەلگە قاشقان كۇدىكتى ازاماتشا شۆەسيادان ەلگە ەكستراديسيالاندى. بۇل تۋرالى ق ر باس پروكۋراتۋراسىنان ءمالىم ەتتى، دەپ حابارلايدى اlmaty-akshamy.kz.
«ەكستراديسيالاۋ تۋرالى شارتتىڭ بولماۋىنا قاراماستان، شۆەسيانىڭ ادىلەت مينيسترلىگى قارىم-قاتىناس قاعيداتى نەگىزىندە جالعان بانكنوتتاردى ءىرى مولشەردە وتكىزگەنى ءۇشىن ىزدەۋدە جۇرگەن ازاماتشا ب.-نى قازاقستانعا بەرۋ تۋرالى ەلىمىزدىڭ باس پروكۋراتۋراسىنىڭ ءوتىنىشىن قاناعاتتاندىردى»، - دەلىنگەن ۆەدومستۆو اقپاراتىندا.
ءمالىم ەتىلگەندەي، قازاقستان ازاماتشاسى 2019 جىلعى جەلتوقسان – 2020 جىلعى قاڭتار ارالىعىندا قازاقستان بانكتەرىنىڭ بىرىندە جۇمىس ىستەيتىن قىزمەتكەردىڭ كومەگىمەن جالعان ەۋرو بانكنوتتارىن ايىرباستاعان دەگەن كۇدىككە ءىلىنىپ وتىر.
قىلمىس جاساعاننان كەيىن ب.، قازاقستاندىق قۇقىق قورعاۋ ورگاندارىنان بوي تاسالادى. وعان حالىقارالىق ىزدەۋ جاريالاندى.
ونىڭ سەرىكتەستەرى ءارتۇرلى مەرزىمگە باس بوستاندىعىنان ايىرۋ جازالارىنا كەسىلگەن.
«بۇگىن باس پروكۋراتۋرا مەن قارجىلىق مونيتورينگ اگەنتتىگىنىڭ قىزمەتكەرلەرى سىرتقى ىستەر مينيسترلىگىنىڭ كومەگىمەن كۇدىكتى ب.-نى قىلمىستىق جاۋاپتىلىققا تارتۋ ءۇشىن قازاقستانعا ەكستراديسيالادى».
قازىرگى ۋاقىتتا ول قىلمىستىق-اتقارۋ جۇيەسى كوميتەتى استانا قالاسى بويىنشا دەپارتامەنتىنىڭ تەرگەۋ يزولياتورىنا قامالدى.
«اتالعان قىلمىستى جاساعاندار 5 جىلدان 10 جىلعا دەيىن باس بوستاندىعىنان ايىرىلۋى مۇمكىن»، - دەدى باس پروكۋراتۋرانىڭ باسپا ءسوز قىزمەتىنەن.