بانك كارتاسى – قازىرگى زامانعى ادامنىڭ اجىراماس اتريبۋتى. بىرنەشە قورعانىش دارەجەسىنىڭ بولۋىنا جانە ونىڭ سەنىمدىلىگىنە قاراماستان، الاياقتار حالىقتىڭ دەرەكتەرى مەن اقشاسىن يەمدەنىپ كەتىپ جاتىر.
سوڭعى ۋاقىتتا الاياقتار ازاماتتارعا حابارلاسۋ كەزىندە الماتىدا بولعان قايعىلى وقيعا كەزىندە بانكتەردىڭ كەيبىر بولىمشەلەرىنە توناۋشىلاردىڭ كىرگەنىن پايدالانۋدا، دەپ حابارلايدى Almaty-akshamy.kz ق ر قارجى نارىعىن رەتتەۋ جانە دامىتۋ اگەنتتىگىنە سىلتەمە جاساپ.
اگەنتتىك ماماندارىنىڭ ايتۋىنشا، كارتاڭىزدىڭ ءنومىرىن، اتىڭىز بەن تەگىڭىزدى، جسن-دى عانا ءبىلىپ، الاياقتار ودان اقشانى الا المايدى. ولارعا مىناداي قوسىمشا اقپارات قاجەت: كارتانىڭ قولدانىس مەرزىمى جانە قاۋىپسىزدىك كودى (مىسالى، VISA كارتالارى ءۇشىن CVV-كود نەمەسە MasterCard كارتالارى ءۇشىن CVC-كود). ەگەر الاياقتار بانكتەن ءسىزدىڭ تەلەفونىڭىزعا SMS تۇرىندە كەلىپ تۇسەتىن حابارلامالارداعى نەمەسە PUSH-حابارلامالارداعى ءبىرجولعى كودتاردى ءبىلىپ قويسا نەمەسە ونلاين-بانكينگتىڭ لوگينى مەن ءقۇپياسوزىن الىپ قويسا، سوندا ولار ءسىزدىڭ كارتاڭىزبەن كەز كەلگەن وپەراسيانى كەدەرگىسىز جاساۋعا مۇمكىندىك بەرەتىن اقپارات الا الادى.
سوڭعى ۋاقىتتا الاياقتار ازاماتتارعا حابارلاسۋ كەزىندە الماتىدا بولعان قايعىلى وقيعا كەزىندە بانكتەردىڭ كەيبىر بولىمشەلەرىنە توناۋشىلاردىڭ كىرگەنىن پايدالانۋدا. ەندى الاياقتاردىڭ ايتۋىنشا، قاراپايىم ازاماتتاردىڭ جەكە دەرەكتەرى مەن بانك كارتالارىنىڭ دەرەكتەمەلەرى ءۇشىنشى تۇلعالاردىڭ قولىنا ءتۇسىپتى-مىس. ەندى ولاردى قايتادان ءقاۋىپسىز ەتۋ ءۇشىن ولارعا تەلەفونعا كەلگەن كودتى ايتۋ قاجەت.
«بانكتىڭ تاراپىنان قانداي دا ءبىر ىركىلىس بولعان جاعدايدا نە كليەنتتىڭ شوتى بويىنشا كۇماندى وپەراسيالار جاسالسا، بانك ماماندارى ەشقاشان كليەنتتەن قانداي دا ءبىر كودتاردى سۇرامايدى. قاۋىپسىزدىك رەگلامەنتى بويىنشا بانك كليەنتتىڭ كارتاسىن نە شوتىن بۇعاتتاپ، كليەنتكە بۇل تۋرالى SMS نەمەسە موبيلدىك قوسىمشا ارقىلى حابارلايدى، نە بانكتىڭ بايلانىس-ورتالىعى كۇماندى ارەكەتتەر جايىندا حابارلايدى. قانداي دا ءبىر كۇمان تۋىنداعان جاعدايدا كليەنتتىڭ ءوزى ءارقاشان دا بانكتىڭ call-ورتالىعىنا نەمەسە بولىمشەسىنە جۇگىنەدى جانە قارجى ۇيىمىنىڭ «قاۋىپسىزدىك ايماعىندا» بولا الادى»، - دەيدى قنردا كيبەرقاۋىپسىزدىك باسقارماسىنىڭ باستىعى رومان پەرمينوۆ.
ەگەر سىزگە بانكتەن-مىس قوڭىراۋ شالسا، تۇتقانى قويىپ، جاڭالىقتاردان تەكسەرىپ الىڭىز، قاجەت بولعان جاعدايدا، بانككە حابارلاسىڭىز.
ماماندار قانداي كەڭەس بەرەدى؟
- ءسىز جاساماعان وپەراسيالاردى باقىلاۋ ءۇشىن ءموبيلدى بانك پەن SMS-حابارلاندىرۋدى قوسىڭىز. وسىلايشا ءسىز الاياقتاردىڭ ارەكەتتەرىنە جەدەل دەن قويا الاسىز جانە بۇل جاعدايدا ۋاقىت وتە ماڭىزدى.
- وزىڭىزبەن بىرگە الىپ جۇرەتىن جانە كۇندەلىكتى شىعىندار ءۇشىن پايدالاناتىن كارتادا ءىرى كولەمدەگى اقشانى ساقتاماڭىز. قاجەت بولسا، نەگىزگى شوتتان نەمەسە دەپوزيتتەن اقشا اۋدارعان دۇرىس نەمەسە ينتەرنەتتە ساتىپ الۋ ءۇشىن جەكە تولەم نەمەسە ۆيرتۋالدى كارتا اشقان دۇرىس.
- قارت تۋىستارىڭىزعا الاياقتاردىڭ ايلا-امالدارى تۋرالى ايتىڭىز، ويتكەنى كوبىنەسە سولار قاسكۇنەمدەردىڭ نىساناسىنا اينالادى.