بالقاش تۇرعىندارى ءتورت تاۋلىكتەن بەرى سۋسىز وتىر

قۇبىرداعى اقاۋ جوندەلمەي جاتىر.

بالقاش تۇرعىندارى ءتورتىنشى تاۋلىك سۋسىز وتىر. كەشە جەرگىلىكتى اكىمدىك قالا بويىنشا سۋ بەرۋ باستالاتىنىن ايتقان بولاتىن. الايدا كەزەكتى اپاتقا بايلانىستى حالىق اۋىزسۋعا ءالى قوسىلعان جوق، دەپ حابارلايدى اlmaty-akshamy.kz قازاقپاراتقا سىلتەمە جاساپ.

بالقاش سورعى ستانسياسى اۋماعىنداعى ماگيسترالدىق سۋ قۇبىرىندا ءىرى اپات 4 ساۋىردە بولعان ەدى.

كەشە اكىمدىكتە ماماندار ديامەترى 800 مم نەگىزگى قۇبىردان ديامەترى 400 مم اعىزۋ قۇبىرىندا ىسىرمانى بولشەكتەگەنىن جانە جوندەۋ جۇمىستارى اياقتالعانىن حابارلادى. قالا بيلىگى سۋ كەزەڭ-كەزەڭىمەن بەرىلە باستايدى دەپ ۋادە بەردى.

بۇگىن بالقاش قالاسى اكىمدىگىنىڭ باسپا ءسوز قىزمەتى 6 ساۋىردە قالالىق رەزەرۆۋارلار تازا سۋمەن تولتىرىلا باستاعانىن، الايدا ايدالاتىن سۋ كولەمى ۇلعايعان كەزدە باس سورعى ستانسياسىندا ىسىرما كەپتەلىپ قالعانىن حابارلادى.

«ماگيسترالدىق قۇبىرداعى سۋ سوققىلارى مەن ەكپىندەردى بولدىرماۋ ماقساتىندا توقىراۋ باس سورعى ستانسياسىنان قالانىڭ تازا سۋ رەزەرۆۋارلارىنا سۋ بەرۋ بىرتىندەپ ۇلعايتىلا وتىرىپ جۇرگىزىلدى. سۋ بەرۋ كولەمىنىڭ كەزەكتى ۇلعايۋى كەزىندە نەگىزگى سورعى ستانسياسىندا ديامەترى 500 مم ىسىرمانىڭ كەپتەلۋى ورىن الدى. بۇل بىزگە جۇمىس پارامەترلەرىنە شىعۋعا مۇمكىندىك بەرمەي جاتىر»، – دەلىنگەن حابارلامادا.

اۋىزسۋسىز قالعان قالا تۇرعىندارى ءۇشىن ءتورت سۋ تاسيتىن كولىك جۇمىس ىستەۋدە. ولاردىڭ ءبىرى – قوڭىرات شاعىناۋدانىندا، ەكىنشىسى – بالقاش ستانسياسىندا، تاعى ەكەۋى بارلىق شاعىناۋدان بويىنشا جۇرەدى.