سوڭعى جىلدارى مەكتەپ وقۋشىلارىنىڭ جازعى دەمالىسىنا كەڭىنەن كوڭىل ءبولىنىپ، بارلىق جاعداي جاسالىپ جاتىر. ويتكەنى، جازعى دەمالىس بالانىڭ تۇلعالىق تۇرعىدا ءوسىپ، داميتىن كەزى. بۇل كەزدە بالانىڭ بويى عانا ەمەس، ءوي-ورىسى دە داميدى. وسى كەزدە وڭى مەن سولىن، قىسقاسى ءومىردى تەرەڭىرەك تانىپ، بولاشاققا قادام جاسايتىن مەزگىلى. سوندىقتان دا، جازعى دەمالىس ماۋسىمىن پايدالى ءارى قىزىقتى ەتىپ وتكىزۋ – ءار بالاعا بەرىلەتىن مۇمكىندىك.
مىنە، وقۋ جىلى اياقتالا سالا، بوستاندىق اۋدانىنداعى «م.ماقاتايەۆ اتىنداعى №140 گيمنازيا» جانىنان “بالداۋرەن” جازعى لاگەرى ءوز جۇمىسىن باستاپ كەتتى. مەكتەپ وقۋشىلارى ءۇشىن اسىعا كۇتكەن دەمالىس كەزەڭى قىزىققا، شاتتىققا تولى كۇندەردى باستادى. جالپى، جازعى دەمالىستى ءاربىر بالا اسىعا توسساتىن بولسا، بۇل ولاردىڭ اتا-اناسى ءۇشىن باستى ماسەلە. ويتكەنى، كەز-كەلگەن اتا-انا بالاسىنىڭ ءقاۋىپسىز ورتادا، سەنىمدى تاربيەشىلەردىڭ باقىلاۋىندا دەمالعانىن قالايدى. وسى تۇرعىدا مەكتەپ جانىنان اشىلىپ وتىرعان “بالداۋرەن” جازعى لاگەرى – ناعىز سەنىمدى ورتا. لاگەر باعدارلاماسى جان-جاقتى جاسالعان. تاڭعى جاتتىعۋدان باستاپ، شىعارماشىلىق ۇيىرمەلەر، تەاترلاندىرىلعان قويىلىمدار، سپورتتىق جارىستار، تانىمدىق ساعاتتار، مادەني ورىندارعا ساياحات - بارلىعى بالالاردىڭ ۋاقىتىن مازمۇندى وتكىزۋگە باعىتتالعان. لاگەر باعدارلاماسى جان-جاقتى جاسالعان. تاڭعى جاتتىعۋدان باستاپ، شىعارماشىلىق ۇيىرمەلەر، تەاترلاندىرىلعان قويىلىمدار، سپورتتىق جارىستار، تانىمدىق ساعاتتار، مادەني ورىندارعا ساياحات - بارلىعى بالالاردىڭ ۋاقىتىن مازمۇندى وتكىزۋگە باعىتتالعان.
اتالمىش لاگەردىڭ اشىلۋ سالتاناتىندا گيمنازيا ديرەكتورى ءسانيا وسكەنباي قىزى ءسوز الىپ، لاگەردىڭ سانيتارلىق-گيگيەنالىق تالاپقا ساي جاساقتالعانىن تىلگە تيەك ەتىپ، ەڭ باستىسى-بالالاردىڭ قاۋىپسىزدىگى مەن دەنساۋلىعى ەكەنىن قاداپ ايتتى. وسىدان سوڭ، تاربيەشى ۇستازدار جىلى لەبىزدەرىن ءبىلدىرىپ، بالالاردىڭ دەمالىسىنىڭ قىزىقتى وتۋىنە تىلەكتەسىگىن ءبىلدىردى. گيمنازيا اكىمشىلىگى تاراپىنان تەگىن بالمۇزداق تاراتىلدى. ءتۇرلى-تۇستى شارلارمەن بەزەندىرىلگەن الاڭدا بالالار ءان سالىپ، بي بيلەدى. ءتۇرلى سپورتتىق، ۇلتتىق ويىنداردى ويناعان بالالار ءۇشىن جازعى دەمالىس باستالىپ تا كەتتى.
تاقىرىپقا وراي:
س.ز. نۇرتايەۆا م.ماقاتايەۆ اتىنداعى
№140 گيمنازيا ديرەكتورىنىڭ وقۋ ءىسى جونىندەگى ورىنباسارى:
ەڭ باستىسى-بالانىڭ قاۋىپسىزدىگى
بيىل “بالداۋرەن” لاگەرى وقۋشىلاردىڭ بوس ۋاقىتىن ءتيىمدى ۇيىمداستىرىپ، ولاردىڭ تۇلعالىق دامۋىنا ىقپال ەتەتىن كوپتەگەن جاڭا جوبالارمەن تولىعىپ وتىر. ءاربىر كۇننىڭ وزىندىك تاقىرىبى، دايەكسوزى، مەرەكەسى بار. بۇل – بالالاردىڭ ويلاۋ قابىلەتىن، شىعارماشىلىعىن، توپپەن جۇمىس ىستەۋ داعدىلارىن دامىتۋعا ارنالعان تىڭ ءادىس. اتا-انالار دا لاگەر جۇمىسىنا زور سەنىم ءبىلدىرىپ وتىر. ويتكەنى، بۇل – قورشاعان ورتانى ءتانىپ-بىلۋ، دوستار تابۋ، ءوز قابىلەتتەرىن اشۋ الاڭى. لاگەرگە قابىلدانعان ءاربىر وقۋشىنىڭ دەنساۋلىعى الدىن الا تەكسەرىلەدى. كۇندەلىكتى مەديسينالىق باقىلاۋ جۇرگىزىلەدى، ارنايى مەديسينا قىزمەتكەرى تۇراقتى تۇردە جۇمىس ىستەيدى. تاماقتانۋ جۇيەسى دە سانيتارلىق نورمالارعا ساي ۇيىمداستىرىلعان. بالالار ۇنەمى تاربيەشىلەر مەن جەتەكشىلەردىڭ باقىلاۋىندا بولادى. تەرريتوريادا بەينەباقىلاۋ ورناتىلعان، كىرۋ مەن شىعۋ ارنايى جۋرنال ارقىلى تىركەلەدى. بارلىق توپ جەتەكشىلەرى مەن قىزمەتكەرلەر قاۋىپسىزدىك تەحنيكاسى جانە العاشقى كومەك كورسەتۋ بويىنشا نۇسقاۋلىقپەن تانىستىرىلعان. سونىمەن قاتار، لاگەر اۋماعىندا ءورت قاۋىپسىزدىگى، توتەنشە جاعدايلار كەزىندەگى ءىس-قيمىل ءتارتىبى ناقتى جوسپارلانىپ، جاتتىعۋلار وتكىزىلەدى. ءبىز ءۇشىن ءاربىر بالانىڭ اماندىعى مەن جايلى جاعدايى – ەڭ ماڭىزدى مىندەت. سوندىقتان “بالداۋرەن” لاگەرى - اتا-انا ءۇشىن ەڭ قاجەتتى، ال بالا ءۇشىن شاتتىق پەن قىزىققا تولى دەمالىس ورىنى.