بالالار سىيلىق العاندى جاقسى كورەدى. مەرەكە كۇنى، تۋعان كۇنى نەمەسە سەبەپسىز-اق قالاعان نارسەسىن الدىرتقىسى كەلىپ تۇرادى. كەيدە ولاردىڭ سۇراعان زاتىن الىپ بەرۋگە اتا-انانىڭ قالتاسى كوتەرمەيتىن جاعداي بولادى. وندايدا نە ىستەۋ كەرەك؟
"بالانىڭ كوپ سىيلىق تالاپ ەتۋىنىڭ سىرى نەدە؟ بۇل ماسەلەنى ەكى جاققا ءتيىمدى ەتىپ قالاي شەشۋگە بولادى؟" دەگەن سۇراقتار توڭىرەگىندە Lisa.ru سايتىنىڭ پسيحولوگى كارينا ريحتەرەنىڭ كەڭەسىنە قۇلاق تۇرەلىك.
ءبارىمىز بالامىزدىڭ باقىتتى بولعانىن قالايمىز، قولىمىزدان كەلگەنشە سۇراعانىن الىپ بەرۋگە تىرىسامىز. بالانىڭ سىيلىق سۇراي بەرۋىنىڭ سەبەبى نەدە؟ پسيحولوگ مامان مۇنىڭ 6 سەبەبىن اتاپ كورسەتتى.
- سىرتقى بەينەگە قاتتى ءمان بەرۋ
بالاعا باسقالار سياقتى ويىنشىقتارى نەمەسە سوڭعى ۇلگىدەگى تەلەفونى بولماسا، ونىمەن ەشكىم دوس بولمايتىن سياقتى كورىنەدى. وعان ءوز مارتەبەسىن كوتەرۋ ءۇشىن سىيلىقتار قاجەت بولادى.
- وزىندىك باعالاۋدىڭ تومەندىگى
ەگەر وتباسىندا بالاعا جىلۋلىق جەتىسپەسە، اتا-اناسى جۇمىسپەن نەمەسە باسقا بالالارمەن اينالىسىپ كەتكەن بولسا، سىيلىققا دەگەن سۇرانىس (تيىسىنشە، وسى وتىنىشتەرىنىڭ ورىندالۋى) بالاعا ءوزىن جاقسى كورۋ مەن باعالاۋدىڭ دالەلى رەتىندە قىزمەت ەتەدى.
- ورىنسىز كوتەرمەلەۋ
كوبىنەسە سىيلىقتار اتا-انا ءۇشىن بالاسىنىڭ مىنەز-قۇلقىن تۇزەتۋ تاسىلىنە اينالىپ كەتەدى - ەگەر ول كەلىسىمدەردى ورىنداسا نەمەسە جاقسى وقيتىن بولسا، وندا ءبىر ايدىڭ نەمەسە توقساننىڭ سوڭىندا ول قالاعان گادجەتىن نەمەسە باسقا سىيلىعىن الادى. وسىنىڭ ناتيجەسىندە، بالا ءوزىنىڭ كەز كەلگەن ارەكەتى ءۇشىن سىياقى العىسى كەلەدى، ۇنەمى جاڭا ماراپاتتى تالاپ ەتەتىن بولادى.
- بار نارسەنى پايدالانا الماۋ
جاڭا ويىنشىق جاڭا تاجىريبەلەر مەن جاڭا مۇمكىندىكتەر بەرەتىندىگىمەن قۇندى. ءبىراق بۇل اسەر تەز جوعالادى. قولىندا بار نارسەلەردەن ءلاززات الۋعا ۇيرەنبەگەن بالا اناسىنان نەمەسە اكەسىنەن ۇنەمى جاڭالىقتىڭ اسەرىن ساقتاپ وتىرۋدى، ياعني ىلعي جاڭا ويىنشىق اپەرۋدى تالاپ ەتەدى.
- وتەماقى
كەيدە اتا-انانىڭ ءوزى بايقاماي ۇلىنىڭ نەمەسە قىزىنىڭ جاڭا نارسەگە دەگەن قۇشتارلىعىن وياتادى. كەزىندە ءوزىنىڭ جاڭا جىلدا العىسى كەلگەن قۋىرشاق نەمەسە ماشينانىڭ ورنىنا ەتىك، باسقا كيىم العان كەزدەگى قيىندىقتار مەن كوڭىلسىزدىكتەرگە تولى بالالىق شاقتارىن ەسىنە الادى.
تاعى ءبىر اتا-انا بالاسىنا جەتكىلىكتى ۋاقىت بولە الماعاندىعىنا ءوزىن كىنالى سەزىنەدى، سوندىقتان ونىڭ ورنىن ۇل-قىزىنا سىيلىق بەرۋ ارقىلى «وتەيدى».
ال ەندى ءبىر اتا-انا بالاسىنا دەگەن ماحابباتىن باسقا جولمەن قالاي كورسەتۋ كەرەكتىگىن بىلمەيدى، سوندىقتان تەك زات ساتىپ الىپ بەرە بەرەدى.
- باسقا تۋىستارىنىڭ ىقپالى
كەيدە اتاسى مەن اجەسى سۇيىكتى نەمەرەسىن ءبىز بولماساق كىم ەركەلەتەدى دەگەن ويمەن سىيلىقتى ۇيىپ-توگىپ جاتادى. ءبىراق بالاعا ونى كىمنىڭ ەركەلەتكەنىنىڭ ايىرماشىلىعى جوق، وسىعان ۇيرەنىپ العان سوڭ، ۋاقىت وتە كەلە، ول بارلىق وتباسى مۇشەلەرىنەن سىيلىق تالاپ ەتە باستايدى.
سىيلىقتارعا قاتىستى قانداي دا ءبىر تالاپ مەن مىنەز كورسەتۋ ءارقاشان اتا-انا مەن بالانىڭ اراسىنداعى قارىم-قاتىناستا بىردەڭەنىڭ دۇرىس ەمەس ەكەندىگىن كورسەتەدى. مۇنىڭ سالدارىمەن كۇرەسپەي، وسى ناقتى ماسەلەنى تابۋ جانە شەشۋ كەرەك.
دۇرىس ارەكەت ەتە ءبىلىڭىز! ساراپشىدان 8 كەڭەس
تاۋسىلمايتىن ارمان، كوزىنە تۇسكەننىڭ بارلىق يەمدەنگىسى كەلەتىن ۇمتىلىس - بالانىڭ قالىپتى دامۋ كەزەڭدەرىنىڭ ءبىرى. ول تراكتور كورسە، سونى العىسى كەلەدى، دوسىنىڭ كونسترۋكتورى بار ەكەن، ەندى وعان دا ءدال سونداي كەرەك، بۇل بارشامىزعا تانىس حيكايا.
ءبىراق ەگەر ءسىز الىپ بەرۋدەن باس تارتقانىڭىزدا ول اشۋلانسا، ايلا-شارعى جاساي باستاسا نەمەسە اياۋشىلىق كۇتسە، بۇل پروبلەماعا اينالادى. ءبىزدىڭ مىندەتىمىز - بالانى ءوزىنىڭ قالاۋىن باسقارا بىلۋگە ۇيرەتۋ. ەندى نە ىستەۋىمىز كەرەك؟
- ارەكەتتەرىڭىزدى سارالاڭىز
ءسىزدىڭ ارەكەتتەرىڭىزدە تويىمسىز تابەتكە، سونداي-اق ۇنەمى ءوسىپ وتىراتىن سۇرانىستارعا اكەلەتىن بىردەڭە بار-جوعىن تالداڭىز. بالانىڭ مىنەز-قۇلقىنىڭ نەگىزى ءوز مىنەز-قۇلقىڭىز بولۋى مۇمكىن - ءسىز ونىڭ كوڭىلىن كوتەرۋ ءۇشىن بىردەڭە بەرەسىز، قولىڭىز بوس ەمەس كەزدە وعان «وتەماقى» تولەيسىز نەمەسە وسىلايشا بالالىق كەزىڭىزدەن قالعان «جاراقاتتارىڭىزدىڭ» ورنىن تولتىراسىز.
- ەرەجە ورناتىڭىز
ول بارلىق وتباسى مۇشەلەرىنە، سونىڭ ىشىندە اتا-اجەگە دە قاتىستى بولۋى كەرەك. ەگەر باسقا تۋىستار قوناققا قۇرقول كەلۋگە ۇيالاتىن بولسا، ولار - شىعارماشىلىققا ارنالعان جيىنتىق، قارىنداشتار، ءتۇرلى-تۇستى قاعاز سياقتى پايدالى نارسە اكەلسىن.
قالعان سىيلىقتاردىڭ بارلىعى، سونىڭ ىشىندە مەرەكە كەزىندە دە الدىن الا تالقىلانىپ، بەلگىلەنگەن كەستە بويىنشا بەرىلەتىن بولسىن. اجەسى جاڭا ويىنشىق الىپ بەرەمىن دەسە، ايىنا ءبىر رەتتەن ءجيى ەمەس دەگەن سياقتى كەلىسىپ الىڭىزدار.
- ماراپاتتاۋدىڭ باسقا جولدارىن تابىڭىز
ۇل-قىزىڭىزدى سىيلىق ارقىلى ىنتالاندىرماۋعا تىرىسىڭىز، ەگەر ول ءوزىن جاقسى ۇستاسا، وعان بىردەڭە ساتىپ اپەرۋگە ۋادە بەرمەڭىز. موتيۆاسيانى ماتەريالدىق سالادان كورسەتپەڭىز - ءسىز ونى ماقتان تۇتىڭىز، ونىڭ جەتىستىكتەرىن ماداقتاڭىز جانە ت.ب.
- بالاڭىزدى ءوزىن باعالاۋعا ۇيرەتىڭىز
بالاڭىزدى ءوزىن-وزى سىرتقى جىلتىراعىمەن ەمەس، ىشكى قۇندىلىعىمەن باعالاي بىلۋگە ۇيرەتىڭىز. بۇل سىيلىق العاندا نەمەسە الدەبىر زاتتاردى يەلەنۋ ماعىناسىندا عانا ماڭىزدى ەمەس. ول سونداي-اق سىرتقى بەينەسىمەن ەمەس، سەنىم مەن ءوزارا مۇددەلەر نەگىزىندە قارىم-قاتىناس قۇرۋدى ۇيرەنۋگە دە كومەكتەسەدى.
- بالاڭىزدىڭ نازارىن باسقاعا بۇرىڭىز
ەگەر بالاڭىز بىردەڭەنى الىپ بەرۋدى تالاپ ەتسە نەمەسە بارلىعىندا بار، وزىندە عانا جوعىن ايتىپ كەلسە، نازارىن باسقا جاققا اۋدارۋعا تىرىسىڭىز. ول سىيلىقتى ونىڭ نە ىستەيتىنىن تالقىلاڭىز، بار ويىنشىعىن باسقا قىرىنان قولدانىلىپ كورۋىنە كومەكتەسىڭىز.
بالانىڭ تاڭداۋىن اقىرىن عانا باسقا جاققا باعىتتاڭىز. مىسالى، ەگەر ول ۇيدە ماشينالارى شاشىلىپ جاتىپ، تاعى ءبىر ماشينا اپەرۋدى سۇراپ وتىرسا، وعان ماگنيتتىك كونسترۋكتور ۇسىنىڭىز، سونىمەن قاتار ونىڭ ماشينادان ارتىقشىلىقتارى تۋرالى ايتىپ بەرىڭىز.
- كۇتە ءبىلۋدى ۇيرەتىڭىز
ەگەر بالا ءدال وسى جەردە جانە ءدال ءقازىر سىيلىق العىسى كەلسە، ونى بىرنەشە كۇن نەمەسە اپتا كۇتۋگە كوندىرىڭىز. ەگەر وسى ۋاقىت ىشىندە ونىڭ قالاۋى باسىلماي، ءالى دە سول ويىنشىقتى العىسى كەلىپ وتىرسا، وعان بالاما ۇسىنىپ كورىڭىز نەمەسە ءوزى جەيتىن «ءتاتتى» مەن بالمۇزداقتان باس تارتۋ ارقىلى، قالاعان ويىنشىعىنا جەتەتىن اقشا جيناۋعا بولاتىنىن ايتىڭىز.
ەگەر ول ودان ءارى كۇتۋگە دايىن بولسا، سول ويىنشىق ءۇشىن باسقا نارسەدەن باس تارتامىن دەسە، ويىنشىققا اقشا جيناۋدى بىرگە باستاڭىز.
- زات ەمەس، ەموسيا سىيلاڭىز
بالاڭىزعا زاتتاردان گورى ەموسيالاردى باعالاتۋعا تىرىسىڭىز. ماتەريالدىق سىيلىقتاردىڭ ورنىنا مۇراجايلارعا نەمەسە سپەكتاكلدەرگە اپارىڭىز، كورشى قالاعا نەمەسە قالا سىرتىنا پيكنيككە بارىڭىز، ويىن-ساۋىق ورتالىعىنا نەمەسە مۇز ايدىنىنا بىرگە بارىڭىز. ويىنشىقتار سىنىپ قالادى نەمەسە ۋاقىت وتە كەلە ۇناماي قالۋى مۇمكىن، ءبىراق كوزىمەن كورگەن ەستەلىكتەر ماڭگى بالانىڭ جادىندا قالادى.
- كوبىرەك سويلەسىڭىز
ەگەر ءوزىڭىزدىڭ بالانىڭ ماحابباتىن سىيلىقپەن ساتىپ الىپ جاتقانىڭىزدى بايقاساڭىز، كۇنىنە كەمىندە 30 مينۋتىڭىزدى تەك ۇلىڭىزعا نەمەسە قىزىڭىزعا ارناۋ ءۇشىن كەستەڭىزدى وزگەرتۋگە تىرىسىڭىز. دەمالىس كۇندەرىن بىرگە وتكىزىڭىز، كەشكى استى بىرگە دايىنداڭىز نەمەسە بىرگە ىدىس جۋىڭىز.
وعان ءسىزدىڭ بەرگەن زاتىڭىز ەمەس، بىرگە وتكىزگەن ۋاقىتىڭىز قۇندى بولسىن. ءبىراق كەز كەلگەن ەرەجەنى كەيدە «بۇزىپ» تۇرۋعا بولادى. ەگەر مۇمكىندىك تۋىپ تۇرسا، بالانىڭ قالاعانىن الىپ بەرىڭىز. مەيلى بۇل ونىڭ ونىنشى كولىگى بولسا دا. ءتىپتى بىر-ەكى اپتادان كەيىن ونىمەن ويناماي تاستاپ كەتسە دە. ءبىراق بۇل كەيدە اقشانى ۇقىپسىز جۇمساۋعا، ءدال وسى ساتتەگى قۋانىش سىيلايتىن ءيمپۋلسيۆتى ارەكەتتەر جاساۋعا بولاتىنىن كورسەتەدى. ەڭ باستىسى، مۇنداي ەرەجە «بۇزۋ» ادەتكە اينالماسىن.