الماتىلىق اتا-انالار بالالارىن مەكتەپكە دايىنداۋعا قىزۋ كىرىستى.
تۇرعىنداردىڭ ايتۋىنشا، بيىل مەكتەپ فورماسى ەداۋىر قىمباتتاعان. ال مەملەكەتتەن بەرىلەتىن 40 مىڭ تەڭگە تولىققاندى قاجەتتى كەرەك-جاراق الۋعا جەتپەيدى.
مەكتەپكە دايىندىق بارىسىن Almaty-akshamy.kz Qazaqstan.tv ارناسىنىڭ ماتەريالىنا سىلتەمە جاساي وتىرىپ حابارلايدى.
الماتىلىق بايان تۇرلىبەكوۆا بيىل بالاسىن مەكتەپكە دايىنداۋدى ەرتەرەك كىرىسكەن. ويتكەنى وقۋ جىلىنىڭ باسى تاياپ قالعاندا تاڭداۋ از، باعا قىمبات بولادى دەيدى. وسى جىلى كەرەك-جاراقتىڭ ءبارىن ارزانداۋ الدىم دەگەننىڭ وزىندە ول ءبىر بالاعا 100 مىڭ تەڭگە جۇمساعان.
«مينيمالدى باعالاردى قاراپ ءجۇرىپ العاندا 100-110 مىڭ تەڭگە كەتىپ قالادى ءبىر بالاعا. ەندى اياق كيىمدەردىڭ باعاسى قىمبات. ساپاسى جاقسىلاۋىن كوردىم بۇگىن، 20 مىڭنىڭ ار جاق، بەر جاعى»، - دەيدى اتا-انا بايان تۇرلىبەكوۆا.
جارمەڭكە مەن ساۋدا ۇيىندەگى باعانى سالىستىرا كەلىپ، ساۋداگەرلەر الماتىداعى ورتاشا باعانى ەسەپتەپ بەردى. ماسەلەن، مەكتەپ فورماسىن اق كويلەگىمەن 22 مىڭ تەڭگەگە الۋعا بولاتىنىن ايتادى. ال اياق كيىمدى 14 مىڭعا، سومكەنى 8 مىڭ تەڭگەگە تابۋعا بولادى. سونداي-اق كەڭسە تاۋارلارىنا كەم دەگەندە 7 مىڭ تەڭگە جۇمسالادى ەكەن. بۇل تەك باستاۋىش سىنىپ وقۋشىسىنا ءبىر سىپىرا الاتىن زاتتار عانا. بۇدان بولەك، اتا-انالار سپورتتىق كيىم مەن اياق كيىمدى دە قىركۇيەكتىڭ باسىندا الاتىنىمىز قالتاعا سالماق سالادى دەيدى.
«جىل سايىن تاۋارلار قىمباتتايدى. فورمانىڭ وزىنە 45 مىڭ تەڭگەدەي جۇمسادىق. ودان بولەك سپورتتىق فورماسى بار، اسكەري فورما بار، قوسىمشا شالبارى بار، 100 مىڭ تەڭگەدەي كەتەتىن شىعار ءبىر بالاعا»، - دەيدى اتا-انا ساۋلە الماتوۆا.
ال مەملەكەتتەن الەۋمەتتىك از قامتىلعان وتباسىنداعى بالالار ءۇشىن بىلتىر 17 مىڭ تەڭگە بەرىلسە، بيىل بۇل سوما 40 567 تەڭگە. ناقتىسىن ايتقاندا، قارجىلاي جاردەم اتاۋلى الەۋمەتتىك كومەكتى الىپ وتىرعان وتباسىنداعى بالالارعا جانە تابىسى جان باسىنا شاققاندا 41 مىڭ تەڭگەدەن اسپايتىن وتباسىنداعى وقۋشىلارعا بەرىلەدى. سونداي-اق اتا-اناسىنىڭ قامقورلىعىنسىز قالعان نەمەسە توتەنشە جاعدايدان زارداپ شەككەن وتباسىنداعى بالالارعا دا كومەك كورسەتىلەدى. ول ءۇشىن ءاربىر اتا-انا مەكتەپكە بارىپ، ءوتىنىش جازۋى قاجەت.
«زاڭناماعا سايكەس، ءوتىنىش 15 كۇن ىشىندە قارالادى. ارنايى قۇرىلعان كوميسسيا ءبىلىم بەرۋ ۇيىمىنىڭ جانىنان وتباسىنىڭ بارىپ جاعدايىن زەرتتەيدى، اكتىلەيدى، ءتيىستى قورىتىندىسىن شىعارادى. وسى ورايدا اتاپ كەتەتىن ءبىر جايت، وتكەن جىلدان باستاپ كوپ اتا-انالاردىڭ ۇسىنىسى نەگىزىندە، سۇرانىس نەگىزىندە اتا-انالادىڭ وزدەرى بالالارىمەن بىرگە تاڭداپ كيىم الۋ مۇمكىندىگىن تۋعىزۋ ءۇشىن كومەك قارجىلاي نەگىزدە جۇزەگە اسادى»، - دەيدى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى ءتورايىمىنىڭ ورىنباسارى جولداس باتىرحان.
الايدا كومەك العان اتا-انالار جارمەڭكەنىڭ جەڭىلدىگىن پايدالانا المايدى. ساۋداگەرلەر ونىڭ سەبەبىن بىلاي دەپ ءتۇسىندىردى.
«مەكتەپتەن ول كىسىلەردەن چەك سۇرايدى. ال چەكتىڭ ىشىندە تۇگەل فيسكالدى چەكتە تاۋاردىڭ تۇگەل اتى بولۋى كەرەك. ال جارمەڭكەدە تۇگەل اتىن جازىپ بەرە المايمىز. ءبىز تەك ءمورى بار تاۋار چەگىن بەرە الامىز. ال ول جەردە ءار تاۋاردىڭ اتى كەرەك. اتا-انالارعا قيىنداۋ، قىمبات-قىمبات الادى تاۋارلاردى»، - دەيدى ساتۋشى گۇلميرا داۋىتالييەۆا.
ءيا، بارلىق اقشا اۋدارىمدارى اتا-انالاردىڭ كارتالىق شوتتارى ارقىلى جۇرگىزىلەدى. ايتا كەتەيىك، بيىل مۇنداي ماتەريالدىق كومەك 400 مىڭنان استام وقۋشىعا بەرىلەدى.