الماتىدا قازاقستان رەسپۋبليكاسى سۋ سپورتى تۇرلەرى فەدەراسياسىنىڭ كونفەرەنسياسى ءوتىپ، قازاقستاندىق وليمپيادا چەمپيونى دميتريي بالاندين جاۋاپتى قىزمەتكە تاعايىندالدى، دەپ حابارلايدى اlmaty-akshamy.kz.
اتالعان فەدەراسيا باسپا ءسوز قىزمەتى ءمالىم ەتكەندەي، ۇيىمنىڭ پرەزيدەنتى مەن اتقارۋشى كوميتەتى قايتا سايلاندى.
2016 جىلعى برازيليادا وتكەن وليمپيادا ويىندارىنىڭ جەڭىمپازى دميتريي بالاندين فەدەراسيانىڭ ۆيسە-پرەزيدەنتى قىزمەتىنە تاعايىندالدى.
«ماعان سەنىم ارتقاندارىڭىزعا العىس ايتا وتىرىپ، ەلىمىزدەگى جانە حالىقارالىق ارەناداعى سۋ سپورتى تۇرلەرىنىڭ دامۋىنا ءوز ۇلەسىمدى قوساتىنىم ءۇشىن قۋانىشتىمىن. 2023 جىلى وتكەن ازيا ويىندارىندا ءبىزدىڭ فەدەراسيا سپورتشىلارىنىڭ 80 پايىزى ويىن تۇعىرىنا كوتەرىلدى. بۇل فەدەراسيا جۇمىسىنىڭ تيىمدىلىگىن دالەلدەيدى. 2016 جىلى جەڭىپ العان وليمپيادانىڭ التىن مەدالى ماعان ۇلكەن ەڭبەكتىڭ ناتيجەسىندە كەلدى. بۇگىندە مەن ءوزىمنىڭ تاجىريبەم مەن جىگەرىمدى قازاقستانداعى سۋ سپورتى تۇرلەرىن دامىتىپ، قولداۋعا دايىنمىن»، - دەدى قازاقستان رەسپۋبليكاسى سۋ سپورتى تۇرلەرى فەدەراسياسىنىڭ جاڭا ۆيسە-پرەزيدەنتى دميتريي بالاندين.
ايتا كەتەلىك، بالاندين ريو وليمپياداسىنان بولەك، 2014 جىلى وتكەن ينچحونداعى جازعى ازيا ويىندارىندا ءۇش مارتە جەڭىمپاز اتانعان. قازىرگى تاڭدا ول سپورتتاعى مانسابىن اياقتاپ، جاۋاپتى قىزمەتكە كىرىستى.
ەستەرىڭىزگە سالا كەتەيىك، وسىعان دەيىن بوكستان 2013 جىلعى الەم چەمپيونى، وليمپيادا ويىندارىنىڭ قاتىسۋشىسى ءبىرجان جاقىپوۆ «شىمكەنت كاسىپقوي بوكس تۇرلەرى كلۋبى» كوممۋنالدىق مەملەكەتتىك مەكەمەسىنىڭ ديرەكتورى لاۋازىمىنا تاعايىندالعانىن جازعان بولاتىنبىز.