وسكەلەڭ ۇرپاقتىڭ كەلەشەگىنە ءتيىمدى ينۆەستيسيا
بالالارىنىڭ بولاشاق وقۋىن وسى باستان ويلاعان قازاقستاندىقتار 22 مىڭعا تارتا دەپوزيت اشتى. «Aqyl» مەملەكەتتىك ءبىلىم بەرۋ جيناقتاۋ جۇيەسىنە قاتىستى اقپاراتپەن ەلدىڭ ءبىلىم جانە عىلىم مينيسترلىگىنىڭ قارجى ورتالىعىنىڭ باسقارما ءتوراعاسى اسقار يبرايموۆ ءبولىستى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
ونىڭ ايتۋىنشا، بۇگىندە 31 ملرد تەڭگەگە جۋىق سالىم جاسالعان.
ەستەرىڭىزگە سالا كەتەيىك، ەلدىڭ كەز كەلگەن ازاماتى ءوزىنىڭ نەمەسە بالاسىنىڭ اتىنا دەپوزيت اشا الادى. بۇل رەتتە كورەگەن اتا-انا بانكتىك سىياقىدان بولەك 5-تەن 7% دەيىن مەملەكەتتىك سىياقى الاتىن بولادى. جيناقتالعان قاراجات تەك وقۋ اقىسىن تولەۋگە جۇمسالۋى كەرەك. وتاندىقپەن قاتار شەتەلدىك وقۋ ورىندارىن تاڭداۋعا مۇمكىندىك قاراستىرىلعان.
«بۇل رەتتە، ەگەر بالا جوعارعى وقۋ ورنىنا گرانتقا تۇسەتىن بولسا، وندا بارلىق سىياقىنى قوسا، ياعني جينالعان قاراجاتتىڭ تولىق كولەمى سالىمشىنىڭ مەنشىگىندە قالاتىنىن جانە ول ونى شەشىپ العانعا دەيىن باسقارا الاتىنىن ايتۋ كەرەك. ەڭ باستىسى، بۇل دەپوزيت قازاقستاننىڭ كەپىلدىك بەرۋ قورىمەن ساقتاندىرىلعان، سونداي-اق مەملەكەتتىك ورگاندار جانە ءۇشىنشى تۇلعالار تاراپىنان دا كەز كەلگەن تىيىم سالۋلار مەن شەكتەۋلەر سالۋدان زاڭنامامەن قورعالعانىن ەرەكشە اتاپ ءوتۋ قاجەت»، - دەيدى ق ر بعم قارجى ورتالىعىنىڭ باسقارما ءتوراعاسى اسقار يبراگيموۆ.
.