مينيستر الماتىداعى ءبىلىم ورىندارىن ارالادى.
ق ر ءبىلىم جانە عىلىم ءمينيسترى اسحات ايماعامبەتوۆ الماتى قالاسىنداعى مەكتەپتەر مەن جوعارى وقۋ ورىندارىنا باردى، دەپ حابارلايدى Almaty-akshamy.kz.
«كەشە جۇمىس ساپارى كەزىندە الماتى قالاسىنداعى مەكتەپتەر مەن جوعارى وقۋ ورىندارىندا بولدىم. پەداگوگتارمەن، ۆەدومستۆولىق باعىنىستى جوو-نىڭ رەكتورلارىمەن جانە عىلىمي-زەرتتەۋ ينستيتۋتتارىنىڭ باسشىلارىمەن كەزدەستىم»، دەپ جازدى مينيستر فەيسبۋكتاعى ءوزىنىڭ الەۋمەتتىك پاراقشاسىندا.
ءبىلىم جانە عىلىم ءمينيسترى ءبىلىم مەكەمەلەرىندەگى كۇزەت جۇيەسىمەن تانىسقانىن، قاۋىپسىزدىكتى ارتتىرۋ بويىنشا جۇمىستى كۇشەيتۋ كەرەكتىگىن ايتتى.
«مەكتەپكە بارعان كەزدە كۇزەت جۇيەسىنىڭ، بەينەباقىلاۋ كامەرالارىنىڭ جۇمىسىمەن، دابىل تۇيمەلەرىنىڭ، تۋرنيكەتتەردىڭ ورناتىلۋىمەن جانە ت.ب. تانىستىم. مەكتەپتەر، كوللەدجدەر، جوو باسشىلارىنا جانە اكىمدىكتەر مەن مينيسترلىككە بالالارىمىزدىڭ قاۋىپسىزدىگىن ارتتىرۋ بويىنشا جۇمىستى كۇشەيتۋ قاجەت»، - دەپ جازدى ول.
ونىڭ ايتۋىنشا، سوڭعى قايعىلى وقيعالار ماسەلەنىڭ وزەكتىلىگى مەن ماڭىزدىلىعىن كورسەتەدى.
«ارينە، بۇل شارالاردان بولەك تاربيە جۇمىستارىن دا جۇرگىزۋ قاجەت. پسيحولوگتار مەن الەۋمەتتىك پەداگوگتەردىڭ جۇمىسى، سونىمەن بىرگە بالالاردى فورس-ماجورلىق ارەكەتتەر تۋرالى حاباردار ەتۋ ماڭىزدى»، - دەدى مينيستر.
مەكتەپ ديرەكتورلارىمەن كەزدەسۋ كەزىندە اتتەستاسيا، باسشىلار روتاسياسى، ادىستەمەلىك جۇمىستى ۇيىمداستىرۋ ماسەلەلەرى دە تالقىلانعانىن جەتكىزدى. جولداۋ اياسىندا ايتىلعان پرەزيدەنت تاپسىرمالارىنىڭ ناقتى قالاي جۇزەگە اسىرىلاتىنىنا توقتالىپ ءوتتى. مەكتەپ ديرەكتورلارى كوپتەگەن جاقسى ۇسىنىس پەن يدەيا ايتتى، ءبىز ولاردى الداعى جۇمىستارىندا ەسكەرەتىنىن جەتكىزدى.
«جالپى، مۇعالىمدەرمەن جانە مەكتەپ ديرەكتورلارىمەن سويلەسە وتىرىپ، سۇراقتاردىڭ مازمۇنى، مىسالى، ءبىر جىل بۇرىن قويعان سۇراقتارعا قاراعاندا وزگەرگەنىن بايقادىم جانە بۇل قۋانتارلىق جاعداي. بىلتىر كۇن تارتىبىندە تۇرعان ماسەلەلەردىڭ باسىم كوپشىلىگى شەشىمىن تاپتى»، - دەدى ق ر ءبىلىم جانە عىلىم ءمينيسترى.
ەندى تالقىلاناتىن تاقىرىپتار وقۋ باعدارلامالارىنىڭ مازمۇنىنا، اتا-انالارمەن ءوزارا ارەكەتتەسۋگە، تاربيە جۇمىسىنا الدەقاشان تەرەڭىرەك ەنگىزىلگەنىن ايتتى.
«ءداستۇرلى فورماتقا ورالۋدى تالقىلاي وتىرىپ، ۇستازدار، جالپى العاندا، وقۋشىلاردىڭ جالپى سانىنىڭ سىرقاتتانۋشىلىق دەڭگەيى قاشىقتان وقىتۋعا ءوتىنىش بەرگەندەردىڭ كورسەتكىشىنەن الدەقايدا تومەن ەكەنىن ايتتى. مەكتەپ وقۋشىلارى مەن اتا-انالاردىڭ باسىم كوپشىلىگى وفلاين رەجيمدە وقۋعا ريزا. بۇل ءبىلىم ساپاسىنا، بالالاردىڭ ەموسيونالدى جاعدايىنا جانە ولاردىڭ دەنساۋلىعىنا وڭ اسەر ەتەدى»، - دەيدى باس ۇستاز.
كەزدەسۋ بارىسىندا ارىپتەستەر وقۋشىلاردىڭ ءبىلىمىن تولىقتىرۋ بويىنشا جۇرگىزىلگەن جۇمىستار تۋرالى ايتقانىن باياندادى. سونىمەن بىرگە مەكتەپتەردە جان باسىنا قارجىلاندىرۋدى ەنگىزۋدىڭ تيىمدىلىگى مەن ارتىقشىلىقتارى تۋرالى دا ايتىلعانىنا توقتالدى. ءمينيستردىڭ ايتۋىنشا، وسى جۇيەنىڭ ارقاسىندا مەكتەپتەر اۋقىمدى قارجىلىق رەسۋرستارعا، ۇلكەن قارجىلىق تاۋەلسىزدىككە يە بولدى، تيىسىنشە قارجىنى تيىمدىرەك جۇمساۋعا جانە ماڭىزدى ماسەلەلەردى شەشۋگە قاراجاتتى ۇنەمدەۋگە جانە قايتا بولۋگە ىنتالاندىرۋ پايدا بولدى.
مينيستر مودەرنيزاسيادان وتكەن مەكتەپ كىتاپحاناسىن ارالاعانىن، «وقۋعا قۇشتار مەكتە» جوباسىن جۇزەگە اسىرۋ ءۇشىن مەكتەپ كىتاپحاناسىنىڭ كىتاپحانا قورى كوركەم ادەبيەتپەن تولىققانىن بايقاعانىن جازدى.
«سونىمەن قاتار، اباي اتىنداعى قازۇپۋ-دە بولدىم. مينيسترلىككە باعىنىشتى جوو-نىڭ رەكتورلارىمەن كەزدەسۋ وتكىزدىم. قورىتىندىسى بويىنشا ستۋدەنتتەردىڭ قاۋىپسىزدىگى، سونداي-اق قۇرىلىسقا، جاتاقحانالاردى قايتا قۇرۋعا، وقۋ ۇدەرىسىنە دە قاتىستى ءبىرقاتار تاپسىرما بەردىم»، - دەدى ۆەدموستۆو باسشىسى.
سونىمەن قاتار عىلىمي-زەرتتەۋ ينستيتۋتتارىنىڭ ديرەكتورلارىمەن كەزدەسكەنىن، عىلىمي ورتادا مەملەكەت باسشىسىنىڭ جولداۋى اياسىندا عىلىم تۋرالى زاڭناماعا ەنگىزىلەتىن جاڭا تۇزەتۋلەردى تالقىلاعانىن ايتتى.
«عىلىمي گرانتتاردى قارجىلاندىرۋ شارتتارىنىڭ ۇلعايۋى، ىرگەلى زەرتتەۋلەرمەن اينالىساتىن مەكەمەلەرگە تىكەلەي قارجىلاندىرۋدى ەنگىزۋ، نەگىزگى قارجىلاندىرۋدىڭ ۇلعايۋى جانە عالىمدار ءوز باياندامالارىندا بۇرىننان ايتىپ جۇرگەن باسقا دا وتە ماڭىزدى وزگەرىستەر. كەزدەسۋلەردە ايتىلعان بارلىق ۇسىنىس پەن سۇراق ەسكەرىلدى جانە ولار بويىنشا ءتيىستى جۇمىستار جۇرگىزىلەدى. سوڭىندا «قازاقستان ۇستازى» سىيلىعى يەگەرلەرىن ماراپاتتاۋ راسىمىنە قاتىسىپ، ارىپتەستەردى كەلە جاتقان كاسىبي مەرەكەمەن قۇتتىقتادىم»، - دەپ جەتكىزدى اسحات ايماعامبەتوۆ.