الماتى قالاسىنىڭ اكىمى دارحان ساتىبالدى جۇمىس ساپارى بارىسىندا «مەدەۋ» بيىك تاۋلى سپورت كەشەنىنە بارىپ، جۇرگىزىلىپ جاتقان جاڭارتۋ جۇمىستارىمەن تانىستى.
قالا باسشىسى جاڭعىرتۋ كەزىندە الماتىنىڭ سپورتتىق جانە مادەني مۇراسىنىڭ ءبىر بولىگى سانالاتىن اڭىزعا اينالعان مۇز ايدىنى كەشەنىنىڭ تاريحي كەلبەتى تولىق ساقتالاتىنىن اتاپ ءوتتى، - دەپ حابارلايدى Aqshamnews.kz
جوبا اياسىندا حالىقارالىق ستاندارتقا ساي زاماناۋي ءارى ەنەرگيا ۇنەمدەيتىن كەڭىستىك قۇرۋ جوسپارلانعان. بۇل ءۇشىن جاڭا توڭازىتقىش جابدىعىن ورناتۋ جانە ينجەنەرلىك كوممۋنيكاسيانى تولىق اۋىستىرۋ كوزدەلگەن.
شىعىس قاناتتاعى قوناق ءۇي جاڭارتىلىپ، باتىس تريبۋنادا كوفەحانالار مەن دەمالىس ايماعى ورنالاسقان تەرراسا جاسالادى. كەشەن الدىندا جەراستى پاركينگىنىڭ ۇستىندە «SUN-DECK» اتالاتىن كوپفۋنكسيونالدى قوعامدىق كەڭىستىك فورماتىنداعى دەمالىس ايماعى پايدا بولادى.
ىرگەلەس اۋماقتى كوركەيتۋگە ەرەكشە كوڭىل بولىنگەن: جۇرگىنشىلەر ايماعى، شولۋ الاڭدارى جانە پانورامالىق نۇكتەلەر جاسالادى. سونىمەن بىرگە كوگالداندىرۋ، زاماناۋي جانە ساۋلەتتىك جارىق بەرۋ ورناتىلادى. مۇمكىندىگى شەكتەۋلى ازاماتتار ءۇشىن ەكى جەدەلساتى قاراستىرىلعان.
«مەدەۋ» بيىك تاۋلى سپورت كەشەنىن جاڭارتۋ جۇمىستارىن 2027 جىلى ءتورتىنشى توقساندا اياقتاۋ جوسپارلانىپ وتىر.
