جىل باسىنان بەرى ءبىر جاسقا تولماعان 1180 نارەستە كوروناۆيرۋس جۇقتىرعان.
الماتىنىڭ باس سانيتارى ەل اراسىندا جەلدەي ەسكەن «بالالارعا ەكپە سالىنايىن دەپ جاتىر» دەگەن قاۋەسەتتىڭ نۇكتەسىن قويدى، دەپ حابارلايدى Almaty-akshamy.kz
جانداربەك بەكشيننىڭ ايتۋىنشا، ەلىمىزدە كوروناۆيرۋسقا قارسى سالىنىپ جاتقان ۆاكسينانىڭ بارلىعى 18 جاستان اسقاندارعا ارنالعان.
«بالالارعا ۆاكسينا سالىنادى ەكەن دەگەن قاۋەسەت حالىقتى ۇرەيلەندىرىپ جاتىر. ۆاكسينانىڭ بالالارعا سالىناتىنىن راستايتىن ەشقانداي رەسمي قۇجات جوق. سوندىقتان مۇنداي اڭىز اقپاراتتى تاراتۋدى دوعارۋ كەرەك. ونىڭ بارلىعى حالىقتى الاڭداتۋ ماقساتىندا جاسالىپ جاتىر دەپ ويلايمىن. ەلىمىزدە 18 جاسقا دەيىنگى بالالارعا ۆاكسينا سالۋ ماسەلەسى قارالماعان»، - دەدى الماتى قالاسىنىڭ مەملەكەتتىك باس سانيتار دارىگەرى جانداربەك بەكشين.
باس سانيتاردىڭ مالىمەتىنشە، جىل باسىنان بەرى ءبىر جاسقا تولماعان 1180 نارەستە كوروناۆيرۋس جۇقتىرعان.
«ال شىلدە ايىنىڭ ەكى اپتاسىندا 185 نارەستە اۋىرعان. ولارعا اتا-اناسىنان، ياعني وتباسىندا جۇعىپ جاتىر. ءبىر جاسقا تولماعان نارەستەلەر قاي جەرى اۋىرىپ تۇرعانىن ايتا المايدى. سوندىقتان ولاردى قورعاۋ كەرەك. ونىڭ ۇستىنە 18 جاسقا تولماعان بالالار اراسىندا دا اۋرۋشاڭدىق ءوسىپ بارادى. بىلتىر 280 وقۋشى اۋىرسا، بيىل 5 مىڭعا جەتتى. سوندىقتان قاۋىپسىزدىك شارالارىن ۇستانۋىمىز كەرەك»، - دەدى الماتى قالاسىنىڭ مەملەكەتتىك باس سانيتار دارىگەرى.