پرەزيدەنت زاڭعا قول قويدى.
"ۇلتتىق قور – بالالارعا" جوباسى 2024 جىلى قاڭتاردا ىسكە قوسىلادى، دەپ حابارلايدى Almaty-akshamy.kz
مەملەكەت باسشىسى قاسىم-جومارت توقايەۆ "قازاقستان رەسپۋبليكاسىنىڭ كەيبىر زاڭنامالىق اكتىلەرىنە ۇلتتىق قوردان بالالارعا ارنالعان قاراجاتتى ەسەپتەۋ، تولەۋ جانە پايدالانۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭعا قول قويدى.
زاڭنىڭ ءماتىنى باسپاسوزدە جاريالانادى.
زاڭعا سايكەس، 2024 جىلعى 1 قاڭتاردان باستاپ ۇلتتىق قوردىڭ جىل سايىنعى ينۆەستيسيالىق كىرىسىنىڭ 50%ء-ى بالالار 18 جاسقا تولعانعا دەيىن ولاردىڭ ارنايى جيناقتاۋ شوتتارىنا اۋدارىلادى. بۇل اقشانى مەرزىمىنەن بۇرىن الۋعا تىيىم سالىنادى.
بالا كامەلەتكە تولعاننان كەيىن شوتتاعى اقشاسىن باسپانا ساتىپ الۋعا نەمەسە وقۋ اقىسىن تولەۋگە جۇمساي الادى. الايدا بالا ازاماتتىعىن وزگەرتكەن نەمەسە جوعالتقان جاعدايدا تولەم الۋ قۇقىعىنان ايىرىلادى. ۇلتتىق قوردان بەرىلەتىن قاراجاتقا سالىق سالىنبايدى.
ەسەپشوتتاعى اقشا دوللارمەن جيناقتالادى. ال تولەنەتىن كەزدە سول كۇنگى كۋرسپەن تەڭگەگە اۋدارىلادى.
بالالار اقشانى ماقساتقا ساي پايدالانۋى ءۇشىن بجزق جينالعان قاراجاتتى ەكىنشى دەڭگەيلى بانكتە نەمەسە ۇلتتىق پوشتا وپەراتورىندا اشىلعان شوتقا جىبەرەدى.
ايتا كەتەرى، 18 جاسقا تولعان ازامات شوتتى ءوزى قالاعان بانكتەن اشا الادى.
ەگەر بالا 18 جاسقا تولعاننان كەيىن جينالعان اقشاسىن الماسا، ول شوتتا 10 جىل بويى ساقتالادى. ون جىلدان كەيىن دە قاجەت بولماسا، قارجى سول ادامنىڭ زەينەتاقى شوتىنا اۋدارىلادى.