ۇكىمەتتىڭ كەڭەيتىلگەن وتىرىسىندا پرەزيدەنت بالالارعا قاتىستى قىلمىستاردىڭ كوبەيىپ كەتكەنىن ايتتى، دەپ حابارلايدى Almaty-akshamy.kz Ulysmedia.kz-كە سىلتەمە جاساپ.
«تاعى ءبىر نازار اۋداراتىن ماسەلە – جاس ۇرپاقتىڭ قاۋىپسىزدىگى. بالالارعا قاتىستى جانتۇرشىگەرلىك قىلمىستار جيىلەپ كەتتى. مۇنداي وقيعالار مەكتەپتە، كوشەدە، ءتىپتى، ۇيدە بولىپ جاتىر. سوراقى جاعدايلار وقۋشىلاردىڭ وزىنە قول جۇمساۋىنا سەبەپكەر بولىپ وتىر. ءتىپتى اتا-انالاردىڭ وزدەرى بالاسىنا قورلىق كورسەتىپ، ونىڭ ارتى قايعىلى جاعدايعا ۇلاسىپ جاتادى. وتباسىنداعى زورلىق-زومبىلىقتىڭ الدىن الۋ جۇمىسى ءالسىز. جاۋاپتى مەكەمەلەر مەن قۇقىق قورعاۋ ورگاندارىنىڭ قىزمەتى ويداعىداي ناتيجە بەرگەن جوق. تۇرمىستىق زورلىق-زومبىلىقتىڭ الدىن الۋ ساياساتىن قايتا قاراۋىمىز كەرەك»، – دەدى توقايەۆ.
مەملەكەت باسشىسى ايەلدەر مەن بالالاردىڭ قۇقىقتارىن قورعاۋ شارالارىن زاڭمەن كۇشەيتۋ كەرەكتىگىن ايتتى.
«وتباسى قۇندىلىقتارىن دارىپتەۋ ىسىنە ەرەكشە كوڭىل بولگەن ءجون. تاعى دا ەسكەرتەمىن، ءبىز قوعامداعى، كوشەدەگى، ءتىپتى ءار ۇيدەگى قاۋىپسىزدىكتى قامتاماسىز ەتپەسەك، دامىعان ەلدەردىڭ قاتارىنا قوسىلۋىمىز قيىن بولادى. ازاماتتارىمىز ەركىن ءجۇرىپ-تۇراتىن ءقاۋىپسىز قوعام قۇرۋىمىز قاجەت»، – دەدى پرەزيدەنت.
ايتا كەتەيىك، جۋىردا وسكەمەندەگى ساۋدا ورتالىقتارىنىڭ بىرىندە ءجاسوسپىرىم قىزداردىڭ ءوز قاتارلاستارىن ۇرىپ-سوققان، تىزەرلەپ وتىرعىزىپ، شەشىندىرگەن ۆيدەوسى تارادى. اتالعان وقيعاعا بايلانىستى ق ر قىلمىستىق كودەكسىنىڭ 293-بابىنىڭ 2-بولىگى بويىنشا سوتقا دەيىنگى تەرگەۋ امالدارى ءجۇرىپ جاتىر.