قاراساي اۋدانىنداعى مەكتەپ اسحاناسىندا بالالارعا ەسكىرگەن يوگۋرت بەرگەن
الماتى وبلىسىندا وقۋشىلارعا جارامدىلىق مەرزىمى 2 جىل بۇرىن ءوتىپ كەتكەن يوگۋرت بەرىلگەن، دەپ حابارلايدى Almaty-akshamy.kz
بالالارعا قاتىستى كەزەكتى جاعا ۇستاتار جاڭالىق قازنەتتە تەز تارادى. الەۋمەتتىك جەلىدەگى اقپاراتقا سۇيەنسەك، بالالارعا تەگىن ىستىق تاماقتان بولەك، 2021 جىلى جارامدىلىق مەرزىمى ءوتىپ كەتكەن "راستيشكا" يوگۋرتى بەرىلگەن.
"مەن قاتتى شوشىپ كەتتىم، بۇگىن بالام مەكتەپتە جارامدىلىعى وتكەن يوگۋرت جەگەن. قالعانىن ۇيگە اكەلدى. بالالارعا مەرزىمى ءوتىپ كەتكەن تاماقتى قالاي بەرۋگە بولادى، بالا ۋلانسا، كىم جاۋاپ بەرەدى"، "بۇل ءونىمدى كىم ساتىپ الدى؟ جارامسىز تاماق بەرگەنشە، مۇلدەم تاماقتاندىرماعان دۇرىس"، – دەيدى اتا-انا.
مەكتەپ باسشىلىعى ءونىم جەتكىزۋشىنى وزگەرتۋ جانە كەلىسىمشارتتى بۇزۋ تۋرالى شەشىم قابىلدانعانىن، ءىس سوتقا جىبەرىلەتىنىن حابارلادى. جەتكىزۋشىنىڭ ءوزى كوتەرمە بازاردان ءونىم العان كەزدە جارامدىلىعى ءوتىپ كەتكەن ونىمدەردى بايقاماي قالعانىن ايتىپ اقتالدى.
قاراساي اۋدانىنىڭ ءبىلىم بولىمىندەگىلەر دە وقۋشىلارعا مەرزىمى وتكەن ءونىمدى بەرۋ فاكتىسىن راستادى.
«اقپاراتتى راستاۋ ءۇشىن شۇعىل جۇمىس توبى قۇرىلىپ، ورتا مەكتەپتىڭ اسحاناسىن تەكسەرۋگە جىبەرىلدى. تەكسەرۋ ناتيجەلەرى بويىنشا تاماقتانۋ ساپاسىنا مونيتورينگ اكتىسى جاسالدى. تارتىپتىك جازا جاريالاندى، كاسىپكەرگە حابارلاما جىبەرىلدى، اسحانا باقىلاۋعا الىندى»، - دەدى ۆەدومستۆودان.
ىسكە پوليسيا دا ارالاستى. الماتى وبلىسى پد باستىعى باۋىرجان الەنوۆتىڭ ايتۋىنشا، ق ر قك 306-بابىنىڭ 2-بولىگى بويىنشا قىلمىستىق ءىس قوزعالعان.