بالالاردى قورعاۋ جانە ولاردى ۇيلەسىمدى دامىتۋ اكىمدىكتىڭ ەرەكشە نازارىندا.
مەملەكەت باسشىسىنىڭ شەشىمىمەن بيىل بالالار جىلى بولىپ جاريالاندى. بۇل تۋرالى قالا اكىمى ەربولات دوسايەۆ بوستاندىق اۋدانىنىڭ تۇرعىندارىمەن وتكەن كەزدەسۋدە ايتتى، دەپ حابارلايدى Almaty-akshamy.kz
قالا اكىمى جىل بويى قالادا جەكە جوسپار بويىنشا بالالارعا ارنالعان ءىس-شارالار، قايىرىمدىلىق اكسيالارى مەن فەستيۆالدار وتكىزىلەتىنى ايتتى. بالالارعا مەكتەپكە دەيىنگى ءبىلىم بەرۋ، ياعني بالاباقشالار سانىن كوبەيتىپ قانا قويماي، ولاردىڭ ساپاسى مەن ينكليۋزيۆتىلىگىن ارتتىرۋ ماسەلەلەرى دە ەرەكشە نازاردا بولادى.
«مەكتەپتەر، ولارداعى ورىن تاپشىلىعى تۋرالى مەن جوعارىدا ايتىپ ءوتتىم. تەك پرەزيدەنتتىڭ تاپسىرماسى بويىنشا بالالاردىڭ سپورت جانە شىعارماشىلىق ۇيىرمەلەرگە تەگىن قاتىسۋىن جان باسىنا قارجىلاندىرۋ باعدارلاماسى ىسكە اسىرىلىپ جاتقانىن اتاپ وتكىم كەلەدى. بيىل سپورت سەكسيالارىنا قاتىسۋعا 3،2 ملرد تەڭگە، ال شىعارماشىلىق ۇيىرمەلەرگە 4 ملرد تەڭگە ءبولىندى»، - دەدى ەربولات دوسايەۆ.
سپورت سەكسيالارىنا قاتىساتىن 44 مىڭ بالانىڭ 6،8 مىڭى بوستاندىق اۋدانىندا تۇرادى. ولار 81 سپورت سەكسياسىنا قاتىسادى.
سونداي-اق، قالا بويىنشا شىعارماشىلىق ۇيىرمەلەرگە 54 مىڭ بالا قاتىسادى. بوستاندىق اۋدانىنان 9 مىڭ بالا 115 شىعارماشىلىق ۇيىرمەگە بارادى.
شاھار باسشىسى كەزدەسۋدە بۇل باعدارلامانىڭ حالىقتىڭ ناقتى قاجەتتىلىكتەرىنە قاراي ودان ءارى ىسكە اسىرىلاتىنىن ايتتى.