ق ر وقۋ-اعارتۋ ءمينيسترىنىڭ شاقىرۋىمەن ق ر دەنساۋلىق ساقتاۋ ءمينيسترى اقمارال ءالنازاروۆا ەلورداداعى ءبىلىم بەرۋ ۇيىمدارىنىڭ ديرەكتورلارىمەن كەزدەسۋ وتكىزدى. بۇل كەزدەسۋ ەكى جاقتى ىنتىماقتاستىق ماسەلەلەرىن تالقىلاۋ، بالالار مەن جاسوسپىرىمدەردىڭ دەنساۋلىعىن جاقسارتۋعا باعىتتالعان بىرلەسكەن جوبالاردى جۇزەگە اسىرۋ، مەكتەپتەردە مەديسينالىق قىزمەتتى ۇيىمداستىرۋ، ينكليۋزيۆتى ءبىلىم بەرۋ كابينەتتەرىن دامىتۋ جانە پەداگوگتەر مەن وقۋشىلاردىڭ دەنساۋلىعىن ساقتاۋ ماسەلەلەرىنە ارنالدى، دەپ حابارلايدى aqshamnews.kz
مينيستر عاني بەيسەمبايەۆتىڭ ايتۋىنشا، مەملەكەت باسشىسىنىڭ تاپسىرماسىمەن 1،7 ميلليون وقۋشىنى قامتيتىن مەكتەپتەردە تەگىن تاماقتاندىرۋ جۇيەسى ەنگىزىلگەن. بۇل شارا بالالاردىڭ ءبىلىم الۋداعى ناتيجەلىلىگىن ارتتىرۋعا باعىتتالعان ماڭىزدى قادامداردىڭ ءبىرى بولدى. سونىمەن قاتار، ايماقتاردا مەكتەپ اس ءمازىرىن وڭىرلىك ونىمدەردى پايدالانۋ ارقىلى جاڭارتۋ جۇمىستارى جۇرگىزىلۋدە، براكەراجدىق كوميسسيالار قۇرىلىپ، اتا-انالار، مەكتەپ اكىمشىلىگى جانە مەديسينا قىزمەتكەرلەرى بىرلەسىپ باقىلاۋ جۇمىستارىن اتقارىپ كەلەدى.
وقۋ-اعارتۋ ءمينيسترى بالالاردىڭ قاۋىپسىزدىگى مەن سالاۋاتتى ءومىر سالتىن قالىپتاستىرۋعا باسىمدىق بەرىلەتىنىن، سونداي-اق كاسىپكەرلەردىڭ ءوز جاۋاپكەرشىلىگىن سەزىنۋى ماڭىزدى ەكەنىن اتاپ ءوتتى. مينيستر سانيتارلىق-ەپيدەميولوگيالىق شارالار مەن قۇقىقتىق اكتىلەردى قايتا قاراۋ قاجەتتىلىگىنە توقتالىپ، الداعى جىلداردا ءىرى مەكتەپتەردە ستوماتولوگيا كابينەتتەرىن اشۋ جوسپارلانعانىن مالىمدەدى.
مينيستر اقمارال ءالنازاروۆا سونىمەن قاتار №95 مەكتەپ-ليسەيى، №84 "كاۋسار" بالاباقشاسى جانە استانا قالالىق مامانداندىرىلعان بالالار ۇيىندە بولدى. كەزدەسۋ سوڭىندا پەداگوگتەر دەنساۋلىق ساقتاۋ مينيسترىنە بالالاردىڭ دەنساۋلىعىنا دەگەن قامقورلىعى ءۇشىن العىستارىن ءبىلدىردى.