ءۇش ايدىڭ ىشىندە رەسپۋبليكا بويىنشا بالالاردى 1-سىنىپقا قابىلداۋعا 320 مىڭعا جۋىق ءوتىنىش تۇسكەن. ونىڭ ىشىندە بالالاردىڭ 70%-كە جۋىعى مەملەكەتتىك تىلدە وقۋدى تاڭدادى، دەپ حابارلايدى Almaty-akshamy.kz Almaty.tv-گە سىلتەمە جاساپ.
"اتا-انالارعا قۇجاتتاردى تەزىرەك تاپسىرۋعا كەڭەس بەرەمىز، ويتكەنى قابىلداۋ 1 تامىزدا اياقتالادى. سودان كەيىن مەكتەپتەردە وقۋ-تاربيە ءۇردىسىن ساپالى جوسپارلاۋ مەن ۇيىمداستىرۋ، وقۋلىق تاراتۋ، سىنىپتاردى قالىپتاستىرۋ جانە باسقا دا ۇيىمداستىرۋ جۇمىستارى باستالادى. قۇجات قابىلداۋ باستالعانىنا ءۇش اي ءوتتى جانە وسى ۋاقىت ىشىندە 320 مىڭعا جۋىق ءوتىنىش ءتۇستى. ونىڭ 82%-ى ەلەكتروندى فورماتتا قابىلداندى"، - دەدى وقۋ-اعارتۋ مينيسترلىگى مەكتەپكە دەيىنگى جانە ورتا ءبىلىم كوميتەتىنىڭ ءتوراعاسى گۇلميرا كارىموۆا.
مەملەكەتتىك تىلدە ءبىلىم العىسى كەلەتىندەردىڭ ۇلەسى 70%-كە جۋىقتاعان. قازاق تىلىندە وقىتاتىن سىنىپتارعا قابىلداۋ بويىنشا ەڭ جوعارى كورسەتكىش قىزىلوردا (92،4%)، تۇركىستان (89%) جانە ماڭعىستاۋ (87،1%) وبلىستارىندا تىركەلدى.
وقۋ-اعارتۋ مينيسترلىگى جاڭا وقۋ جىلىندا 400 مىڭنان اسا ءبۇلدىرشىن 1-سىنىپقا بارادى دەپ بولجاپ وتىر.
ايتا كەتەرى، ءبىرىنشى سىنىپقا قۇجات قابىلداۋ 1 ساۋىردە باستالدى. ول 1 تامىزعا دەيىن جالعاسادى. اتا-انالارعا ىڭعايلى بولۋ ءۇشىن قۇجاتتار egov.kz ۆەب-پورتالى ارقىلى قابىلدانادى. سونداي-اق قۇجاتتاردى ءداستۇرلى قاعاز فورماتىندا دا تاپسىرۋعا بولادى.