بيىلعى وقۋ جىلىندا ءبىرىنشى سىنىپقا بارۋعا ءوتىنىش بىلدىرگەندەردىڭ سانى 180 مىڭنان استى، دەپ حابارلايدى اlmaty-akshamy.kz.
بۇل تۋرالى ءبىلىم جانە عىلىم مينيسترلىگىنىڭ الەۋمەتتىك جەلىدەگى پاراقشاسىندا جاريالاندى.
ەسكە سالا كەتەيىك، ازاماتتارعا ىڭعايلى بولۋى ءۇشىن بالالاردى مەكتەپكە قابىلداۋ قىزمەتى اۆتوماتتاندىرىلعان. بۇل جۇمىس egov.kz ۆەب-پورتالى ارقىلى جۇزەگە اسىرىلادى. بالالاردى 1-سىنىپقا قابىلداۋ ءۇشىن قۇجاتتاردى 1 ساۋىردە باستاپ، 1 تامىزعا دەيىن تاپسىرۋعا بولادى.
«ءبىز ازاماتتارعا كورسەتىلەتىن بارلىق قىزمەتتى اۆتوماتتاندىرۋعا باسا نازار اۋدارامىز. ۇبت، بارلىق دەڭگەيدەگى وليمپيادا ەلەكتروندى فورماتقا كوشىرىلدى. مۇنىڭ كوپتەگەن ارتىقشىلىعى بار، ەڭ باستىسى - بارلىق پروسەستىڭ اشىقتىعى. ءبىز اشىقتىقتى جانە ازاماتتارعا قولايلى جاعداي جاساۋدى قولدايمىز. قۇجاتتاردى قابىلداۋدىڭ ءبىرىنشى كۇنىنىڭ وزىندە egov.kz پورتالى ارقىلى 10 مىڭنان استام ەلەكتروندى ءوتىنىش كەلىپ ءتۇستى. مۇنداي ساندار ق ر ءبعم-نىڭ سيفرلىق مەملەكەتتىك قىزمەتتەرى ازاماتتار اراسىندا تانىمال ەكەندىگىن كورسەتەدى»، - دەيدى ءبىلىم جانە عىلىم ۆيسە-مينيسترى ايبات ءىلياسوۆ.
ايتا كەتەيىك، 1-سىنىپقا بالالاردى قابىلداۋ اتا-اناسىنىڭ نەمەسە ءبىلىم الۋشىنىڭ زاڭدى وكىلىنىڭ جەكە ءوتىنىشى نەگىزىندە قابىلدانادى. سونداي-اق مىناداي قۇجاتتار قاجەت: بالانىڭ تۋۋ تۋرالى كۋالىگىنىڭ كوشىرمەسى؛ 026/ۋ-3 نىسانىنداعى دەنساۋلىق جاعدايى تۋرالى قۇجات؛ 065/ۋ نىسانىنداعى دەنساۋلىق جاعدايى تۋرالى قۇجات جانە وقۋشىنىڭ ولشەمى 3ح4 بولاتىن ەكى فوتوسۋرەتى (وقۋعا قابىلداۋدىڭ ۇلگىلىك قاعيدالارىندا ق ر بعم 2018 جىلعى 12 قازانداعى №564 بۇيرىعىنا سايكەس بالالاردى مەكتەپكە قابىلداۋ ءتارتىبى ايقىندالعان).