دانيالىق عالىمدار توبى بالالار اراسىندا ۇزاق COVID-19 دەپ اتالاتىن اۋرۋدىڭ ءوتۋ بارىسىنا زەرتتەۋ جۇرگىزدى.
مامانداردىڭ زەرتتەۋىنشە، 17 جاسقا دەيىنگى بالالارداعى لونگ-كوۆيد التى ايعا جۋىق ۋاقىتقا سوزىلۋى مۇمكىن، دەپ حابارلايدى Almaty-akshamy.kz يزۆەستيا سايتىنا سىلتەمە جاساپ.
زەرتتەۋشىلەر ناۋقاستاردا كوروناۆيرۋستىق ينفەكسيا بەلگىلەرى اۋرۋدىڭ جەدەل كەزەڭىنەن كەيىن ءتورت اپتادان استام ۋاقىت بويى ساقتالاتىن جاعدايلاردى، سونداي-اق ءۇش ايدان استام ۋاقىت بويى بايقالاتىن پوست-كوۆيدتىك سيندرومنىڭ كورىنىستەرىن قوسا زەرتتەگەن.
«كوپ جاعدايدا «ۇزاق مەرزىمدى» COVID-19 بەلگىلەرى ءبىر ايدان بەس ايعا دەيىن سوزىلادى»، - دەپ جازدى عالىمدار جۇمىس ناتيجەلەرى تۋرالى ماقالادا.
زەرتتەۋگە 30 000 بالا قاتىستى: جارتىسى كوروناۆيرۋسپەن اۋىرعان، قالعاندارى باقىلاۋ توبىندا بولدى. قاتىسۋشىلار اتا-انالارىنىڭ كومەگىمەن نەمەسە ءوز بەتىنشە ولاردا كەزدەسەتىن بەلگىلەر مەن اۋرۋدىڭ ۇزاقتىعى تۋرالى سۇراقتارعا جاۋاپ بەردى.
اۋرۋدان ايىققان مەكتەپ جاسىنا دەيىنگى بالالاردىڭ (بەس جاسقا دەيىنگى بالالار) 17،6%-ى، ال مەكتەپ وقۋشىلارىنىڭ (التى جاستان 17 جاسقا دەيىن) 28،2%-ى ءتورت اپتادان استام ۋاقىت بويى COVID-19 بەلگىلەرىن سەزىندى. سونىمەن قاتار، باقىلاۋ توبىنداعى مەكتەپ جاسىنا دەيىنگى بالالاردىڭ 14،8%-ى جانە مەكتەپ وقۋشىلارىنىڭ 27،2%-ى ءتورت اپتادان استام ءار ءتۇرلى جاعىمسىز بەلگىلەردى باستان كەشىردى.
بۇل بالالاردا اۋرۋدىڭ ۇزاق بولۋى تەك كوروناۆيرۋستىق ينفەكسيامەن عانا ەمەس، سونىمەن قاتار كوپتەگەن باسقا اۋرۋلارمەن نەمەسە پسيحولوگيالىق فاكتورلارمەن بايلانىستى بولۋى مۇمكىن. مۇنىڭ اسەرى باقىلاۋ توبىن انىقتاۋعا مۇمكىندىك بەرەدى.
زەرتتەۋ اۆتورلارى باقىلاۋ توبىنداعىلارعا قاراعاندا، كوروناۆيرۋسپەن اۋىرعان مەكتەپ وقۋشىلارىنىڭ اراسىندا سيمپتومدار تەك 0،8%-عا عانا ءتورت اپتادان استام ساقتالاتىنىن اتاپ ءوتتى.