قالا جانە ءوڭىر اكىمدىكتەرى جەرگىلىكتى سپورت باسقارمالارىنىڭ جۇمىسىن ءجىتى قاداعالاۋلارى كەرەك. بۇل تۋرالى مادەنيەت جانە سپورت ۆيسە-مينيسترى سەرىك جاراسبايەۆ مالىمدەدى، دەپ حابارلايدى Almaty-akshamy.kz Elorda.info-عا سىلتەمە جاساپ.
بۇگىن پرەزيدەنت قاسىم-جومارت كەمەل ۇلىنىڭ تاپسىرماسىنا سايكەس، مادەنيەت جانە سپورت ۆيسە-مينيسترى سەرىك جاراسبايەۆتىڭ توراعالىعىمەن مەملەكەتتىك سپورتتىق تاپسىرىس بويىنشا ونلاين فورماتتا جينالىس ءوتتى. قالالار مەن ءوڭىر اكىمدەرىنىڭ ورىنباسارلارى قاتىسقان جيىندا بالالار سپورتىن قارجىلاندىرۋ ماسەلەسى قارالدى.
سەرىك مارات ۇلى مەملەكەتتىك سپورتتىق تاپسىرىس بويىنشا قىزمەت كورسەتۋشىلەرگە تولەنبەگەن قاراجاتتارعا جانە 2022 جىلعا بولىنگەن قارجىعا توقتالدى.
«بالالار سپورتىن قارجىلاندىرۋ باعدارلاماسى بويىنشا ارىز-شاعىمدار وتە كوپ. ولقىلىقتىڭ بارى دا جاسىرىن ەمەس. ءاربىر شاعىمعا جەكە توقتالىپ، جۇمىس جۇرگىزەتىن بولامىز. قالا جانە ءوڭىر اكىمدىكتەرىنەن جەرگىلىكتى سپورت باسقارمالارىنىڭ جۇمىسىن ءجىتى قاداعالاۋلارىن سۇرايمىز. جوبا جالعاسىن تابادى. بالالار سپورتىن، بۇقارالىق سپورتتى دامىتۋ باستى ماقساتىمىز ەكەنىن تاعى ءبىر ەستەرىڭىزگە سالامىن»، - دەدى سەرىك مارات ۇلى.
سونداي-اق ۆيسە-مينيستر ءوز سوزىندە اتالعان جوبا اياسىندا اكىمدىكتەر تاراپىنان قوسىمشا قارجى ءبولىنىپ، قىزمەت كورسەتۋشىلەر جانە اتا-انالار تاراپىنان دا وتىنىشتەر قابىلداۋ جۇمىستارى جانداناتىن بولاتىنىن جەتكىزدى.
بۇگىنگى تاڭدا رەسپۋبليكا بويىنشا مەملەكەتتىك تاپسىرىس شەڭبەرى اياسىندا سپورت ۇيىرمەلەرىندە 162 208 بالا سپورتپەن تەگىن نەگىزدە شۇعىلدانادى. جىل سوڭىنا دەيىن 352 939 بالانى قامتۋ جوسپاردا بار.