پەدياتريا ورتالىعىندا بالالار كۇنى اتاپ ءوتىلدى
بۇگىن پەدياتريا جانە بالالار حيرۋرگياسى عىلىمي ورتالىعىندا حالىقارالىق بالالاردى قورعاۋ كۇنىنە وراي، قاتەرلى دەرتكە جانە سيرەك كەزدەسەتىن اۋرۋلارعا شالدىققان بالالار ءۇشىن «بالبوبەك — بالاپان، جايشى ماعان الاقان!» اتتى مەرەكەلىك شارا ءوتتى، دەپ حابارلايدى Almaty-akshamy.kz.
ايتۋلى مەرەكەگە ارنالعان شارانى پەدياتريا ورتالىعىنىڭ باسشىسى مىندەتىن اتقارۋشى ليازات مانجۋوۆا اشىپ، بارشا قاۋىمدى مەرەكەمەن قۇتتىقتادى. جازدىڭ العاشقى كۇنىمەن تۇسپا-تۇس كەلەتىن بالالار مەرەكەسىمەن سونىمەن قاتار، «Help Today» قوعامدىق قورىنىڭ ديرەكتورى ەليا الييەۆا، جاستار ساياساتى ورتالىعىنىڭ باسشىسى مادينا مەركەيەۆا مەن پەدياتريا ورتالىعىنىڭ №3 ونكوگەماتولوگيا ءبولىمىنىڭ مەڭگەرۋشىسى گۇلنار بۋلابايەۆا قۇتتىقتاپ، اقجارما تىلەكتەرىن ءبىلدىردى.
مەرەكەلىك شارا «Almaty Symphony» الماتى سيمفونيالىق وركەسترىنىڭ كونسەرتتىك باعدارلاماسىمەن اشىلدى. الەمنىڭ ايگىلى اندەرى مەن مۋزىكالىق كومپوزيسيالارىن تارتۋ ەتكەن وركەستردىڭ ونەرى كوپشىلىكتى ءتانتى ەنتى. مەرەكەگە ەلىمىزگە بەلگىلى انشىلەر قۋانىش قۇرمانبايەۆ، قارلىعاش مىرزاگەلدييەۆا مەن «مۋزا» دۋەتى قاتىسىپ، بالالارعا مەرەكەلىك كوڭىل-كۇي سىيلادى.
پەدياتريا ورتالىعىنىڭ دارىگەرلەرى مەن مەيىربيكەلەرى ءداستۇر بويىنشا بيىل دا مەرەكەلىك فلەشموب ارقىلى قۇتتىقتاپ، ونەرلەرىمەن كىشكەنتاي پاسيەنتتەردى قۋانتتى.
مەرەكەدە سونداي-اق، كلينيكانىڭ سەگىز قىرلى ءبىر سىرلى بالالارى: سىمبات قۇرمانبەك ولەڭ وقىسا، گوروحوۆا ارينا «دجاز» ءبيىن، ۇكىباي اياجان «دوستىق» ءبيىن ناقىشىنا كەلتىرە بيلەپ، ءوز ونەرلەرىن پاش ەتتى. كەش سوڭىندا اتا-انالار اتىنان ءسوز سويلەگەن باقىت قوجابەكوۆ ءوز العىسىن ءبىلدىرىپ، جىر شاشۋىن ارنادى.
شارا بارىسىندا «بالالاردىڭ سۋرەت جانە قولونەر كورمەسى» قويىلدى. بالالار ءۇشىن ءتۇرلى مولتەك فيلم كەيىپكەرلەرىمەن فوتوسەسسيالار ۇيىمداستىرىلدى. «Omirsulu» جانە «گروتەسك» شوۋ اگەنتتىگى ۇيىمىنىڭ ەرىكتىلەرى مەن انيماتورلارى بۇلدىرشىندەردىڭ كوڭىلىن كوتەرىپ، بالالارمەن بىرلەسە ءتۇرلى ويىندار وينادى.
مەرەكەلىك شارا سوڭىندا «Help Today»، «جاڭا ءومىر» قوعامدىق قورى مەن «قازاقستاننىڭ ىسكەر ايەلدەر قاۋىمداستىعى» بىرلەستىگى بارشا بالاعا سىيلىقتار مەن تاتتىلەر تاراتىپ، ناۋقاس بالالاردىڭ جۇزدەرىنە قۋانىش سىيلادى.
پەدياتريا ورتالىعىندا ەم الىپ جاتقان بارلىق بالاعا زور دەنساۋلىق، مول باقىت، باقىتتى بالالىق شاق، قۋانىش پەن شاتتىققا تولى جارقىن ءومىر تىلەيمىز! بالالار مەرەكەسى قۇتتى بولسىن! اۋىر دەرتكە شالدىققان بالالارعا مەرەكە، قۋانىش سىيلاپ، اتى جامان اۋرۋدى جەڭۋگە دەگەن سەنىم ۇيالاتۋعا ۇمتىلعان شارانىڭ پسيحولوگيالىق كومەگى زور دەپ بىلەمىز.
بۇل تاراپتا مەرەكەلىك شاراعا اتسالىسقان ورتالىقتىڭ بارشا تاربيەشىلەرى مەن پسيحولوگ ماماندارىنا العىسىمىزدى بىلدىرەمىز! ولار ناۋقاس بالالارعا عانا ەمەس، ولاردىڭ اتا-انالارىنا دا كۇندەلىكتى پسيحولوگيالىق قولداۋ كورسەتىپ كەلەدى.