الماتى قالاسىندا «بالالار قاۋىپسىزدىگى – ورتاق مىندەتىمىز» اتتى جالپىقالالىق اتا-انالار جينالىسى ءوتتى. اتالعان شارانى الماتى قالاسىنىڭ ءبىلىم باسقارماسى، پسيحولوگيالىق قولداۋ ورتالىعى، پروكۋراتۋرا، پوليسيا جانە پسيحيكالىق دەنساۋلىق مەكەمەلەرى بىرلەسىپ ۇيىمداستىردى.
جيىن گيبريدتى فورماتتا ءوتتى: 216 اتا-انا وفلاين قاتىسىپ، 2880 ادام Zoom پلاتفورماسى ارقىلى قوسىلدى.
باستى ماقسات – اتا-انالاردى بالانىڭ قاۋىپسىزدىگىن قامتاماسىز ەتۋگە قاتىستى ماڭىزدى ماسەلەلەرمەن تانىستىرۋ. اتاپ ايتقاندا: زورلىق-زومبىلىقتىڭ الدىن الۋ، كيبەرقاۋىپسىزدىك، گادجەتتەردى دۇرىس پايدالانۋ، ەسىرتكى مەن قۇمار ويىندارعا تاۋەلدىلىكتىڭ ءقاۋپى، بۋللينگ پەن سۋيسيدتىك مىنەز-قۇلىقتى بولدىرماۋ جولدارى، سونداي-اق ۇبت كەزىندە اتا-انالارعا پسيحولوگيالىق قولداۋ كورسەتۋ تاسىلدەرى قامتىلدى.
الماتى قالاسى ءبىلىم باسقارماسىنىڭ باسشىسى سايران تاپەن ۇلى سايفەدەنوۆ شارانى اشىپ، بالا قاۋىپسىزدىگىن قامتاماسىز ەتۋدە مەكتەپ پەن اتا-انانىڭ بىرلەسىپ جۇمىس ىستەۋىنىڭ ماڭىزدىلىعىنا توقتالدى. ول بالالاردىڭ قۇقىق بۇزۋشىلىعى مەن جاراقاتتانۋىن بولدىرماۋ ماسەلەلەرىن ەرەكشە اتاپ ءوتتى.
جيىندا ءتۇرلى سالا ماماندارى مەن ساراپشىلار ءوز تاجىريبەلەرىمەن ءبولىسىپ، اتا-انالارعا ناقتى ۇسىنىستار بەردى. اشىق ديالوگ الاڭى رەتىندە ۇيىمداستىرىلعان بۇل كەزدەسۋ مەكتەپ پەن اتا-انا اراسىنداعى سەنىمدى نىعايتىپ، بالالاردىڭ اماندىعى ءۇشىن بىرىگىپ جۇمىس ىستەۋدىڭ ءتيىمدى جولدارىن ۇسىندى.