ماڭىزدى نورما قابىلداندى
بۇل تۋرالى ءبىلىم جانە عىلىم ءمينيسترى اسحات ايماعامبەتوۆ facebook پاراقشاسىندا جازدى، دەپ حابارلايدى Almaty-akshamy.kz.
ءماجىلىستىڭ جالپى وتىرىسىندا تاعى ءبىر ماڭىزدى نورما قابىلداندى. ماسەلە ءبىر پمپك (پسيحولوگيالىق-مەديسينالىق-پەداگوگيكالىق كونسۋلتاسيالار) اشۋ ءنورماتيۆىن 60-تان 50 مىڭ بالاعا دەيىن وزگەرتۋ تۋرالى بولىپ وتىر. ياعني قازىرگى كۇنى 87 پمپك جۇمىس ىستەپ تۇرسا، ەندى ەلىمىزدىڭ بارلىق وڭىرىنەن قوسىمشا تاعى 40-قا جۋىق پمپك اشىلادى، – دەدى مينيستر.
سوزىنشە، بۇل كەزەكتىلىك ماسەلەلەرىن شەشۋگە اسەر ەتىپ، بالالاردىڭ ەرەكشە ءبىلىم بەرۋ قاجەتتىلىكتەرىن ەرتە انىقتاۋعا جانە ساپالى باعالاۋعا سەپتىگىن تيگىزەدى.
ەستەرىڭىزگە سالا كەتەيىن، ۇلتتىق قوعامدىق سەنىم كەڭەسىنىڭ وتىرىسىندا پرەزيدەنت ۇكىمەتكە وسى ماسەلە بويىنشا شارالار قابىلداۋدى تاپسىرعان بولاتىن. بالالار جىلى اياسىندا وزەكتى جانە ۇزاق ۋاقىت بويى شەشىمىن تاپپاعان ماسەلەلەردى شەشۋگە باعىتتالعان ءبىرقاتار جاڭا باستاما ىسكە اسىرىلادى، – دەپ جازدى اسحات ايماعامبەتوۆ.