وقۋ-اعارتۋ ءمينيسترى عاني بەيسەمبايەۆ پەن مادەنيەت جانە اقپارات ءمينيسترى ايدا بالايەۆا الماتىداعى "دوستىق" ۇيىندە بالالار باسىلىمدارى باس رەداكتورلارىمەن جانە بالالار ادەبيەتى جازۋشىلارىمەن كەزدەسۋ وتكىزدى.
دوڭگەلەك ۇستەلدە بالالار تاقىرىبىندا قالام تەربەپ جۇرگەن شىعارماشىلىق ينتەلليگەنسيا وكىلدەرى سالاداعى تۇيتكىلدى تاقىرىپتاردى كوتەرىپ، وزدەرىن تولعاندىرعان ماسەلەلەر جايلى ءسوز قوزعادى. اتاپ ايتقاندا، بالالارعا ارنالعان گازەت-جۋرنالدار رەداكسياسىندا قىزمەت ەتكىسى كەلەتىن جاس بۋىن تىلشىلەردىڭ ازدىعىن، زاماناۋي تالاپتاردا اڭگىمەلەر مەن ەرتەگىلەر جازاتىن جازۋشىلار قاتارىنىڭ سيرەپ كەتكەنىن جانە باسىلىمدارعا جازىلۋ ماسەلەسىن كوتەردى. سونداي-اق، بالالارعا ارنالعان فيلمدەر ءتۇسىرۋ، تەاترلاردا وزەكتى قويىلىمداردى ساحنالاۋ، الەۋمەتتىك جەلىلەردە ساپالى كونتەنت جاساۋ جايلى ۇسىنىستارىن ايتتى. بالالار باسىلىمدارىنىڭ باسىن بىرىكتىرەتىن قاۋىمداستىق قۇرۋ، وسى تاقىرىپتاردا جازاتىن قالامگەرلەر اراسىندا جەكە بايقاۋ وتكىزۋ، مەكتەپ كىتاپحاناشىلارىنىڭ مارتەبەسىن بەلگىلەۋ قاجەتتىگى دە تالقىلاندى.
جيىنعا قاتىسقان زيالى قاۋىم وكىلدەرىنىڭ ۇسىنىس-تىلەكتەرىن مۇقيات تىڭداعان مينيسترلەر ءتيىستى شارالار قابىلداناتىنىن جەتكىزدى.
مەملەكەت باسشىسىنىڭ تاپسىرماسى بويىنشا "وقۋعا قۇشتار مەكتەپ – وقۋعا قۇشتار ۇلت" جوباسى جۇزەگە اسىرىلۋدا. "بالالار كىتاپحاناسى" باعدارلاماسىن ىسكە اسىرۋ ماقساتىندا كىتاپحانانىڭ جاڭا مودەلى قۇرىلىپ جاتىر. بيىلعى وقۋ جىلىندا 100 كوركەم، عىلىمي-تانىمدىق كىتاپ وقىعانى ءۇشىن بەلسەندى وقىرمانداردى كوتەرمەلەۋ، ەلەكتروندىق كىتاپحانالار جانە ونلاين-رەسۋرستارىن قۇرۋ، گازەت-جۋرنالداردى وقۋ مادەنيەتىن ارتتىرۋ شارالارى قولعا الىندى. بۇل باعىتتاعى جۇمىستار "ءبىرتۇتاس تاربيە باعدارلاماسى" شەڭبەرىندە دە ەسكەرىلەدى. مەكتەپ كىتاپحاناشىلارىنىڭ مارتەبەسىن، ەڭبەكاقىسىن كوتەرۋ ماسەلەسى كوپ ۇزاماي شەشىمىن تابۋى ءتيىس. قازىرگى ۋاقىتتا ءتيىستى مەملەكەتتىك ورگاندارمەن تالقىلاۋ جۇرگىزىلۋدە. ال، بالالار باسىلىمدارىنا جازىلۋدى مەكتەپ ۇجىمدارىمەن، اتا-انالار قاۋىمداستىعىمەن بىرلەسە تالقىلايمىز، دەدى وقۋ-اعارتۋ ءمينيسترى عاني بەيسەمبايەۆ.
جيىن سوڭىندا بالالار باسىلىمدارى ۇجىمدارىنا وقۋ-اعارتۋ ءمينيسترىنىڭ العىس حاتتارى تاپسىرىلىپ، ماراپاتتالدى.