قازاقستاندىق بالالار بۇۇ-عا تىكەلەي شاعىمدانا الادى.
نيۋ-يوركتەگى بىرىككەن ۇلتتار ۇيىمىنىڭ شتاب-پاتەرىندە قازاقستان رەسپۋبليكاسىنىڭ بۇۇ جانىنداعى تۇراقتى وكىلى اقان راحمەتۋللين قازاقستان اتىنان بالا قۇقىقتارى تۋرالى كونۆەنسياعا حابارلار راسىمىنە قاتىستى فاكۋلتاتيۆتىك حاتتاماعا قول قويدى، دەپ حابارلايدى Almaty-akshamy.kz. قازاقپاراتقا سىلتەمە جاساپ.
قازاقستان بۇۇ باس اسسامبلەياسى 2011 جىلعى جەلتوقساندا قابىلداعان جانە 2012 جىلعى 28 اقپاندا قول قويۋ ءۇشىن اشىلعان وسى ادام قۇقىقتارى سالاسىنداعى ماڭىزدى حالىقارالىق شارتقا قول قويعان 53ء-شى مەملەكەت بولدى.
قۇجات بۇۇ-نىڭ بالا قۇقىقتارى جونىندەگى كوميتەتىنە (بالا قۇقىقتارى سالاسىنداعى 18 تاۋەلسىز ساراپشىلار توبى) بۇۇ-نىڭ بالا قۇقىقتارى بويىنشا ءۇش نەگىزگى قۇجاتپەن (بالا قۇقىقتارى تۋرالى كونۆەنسيا جانە ونىڭ ەكى فاكۋلتاتيۆتىك حاتتاماسى – بالالاردى قارۋلى قاقتىعىستارعا تارتۋ جانە بالالاردى ساتۋ، بالالار جەزوكشەلىگى جانە بالالار پورنوگرافياسى تۋرالى) كوزدەلگەن بالا قۇقىقتارىنىڭ بۇزىلۋى تۋرالى شاعىمداردى قابىلداۋ جانە قاراۋ وكىلەتتىگىن بەرەدى.
3ء-شى فاكۋلتاتيۆتىك حاتتاماعا سايكەس، بالالار نەمەسە ولاردىڭ وكىلدەرى بۇۇ-نىڭ بالا قۇقىقتارى جونىندەگى كوميتەتىنە ءوز قۇقىقتارىنىڭ بۇزىلۋى تۋرالى تىكەلەي شاعىم بەرە الادى. كوميتەت، ءوز كەزەگىندە، ءاربىر ءىستى قاراپ، قاتىسۋشى مەملەكەتتەرگە ناقتى ۇسىنىستار باياندالعان شەشىمدەر قابىلدايدى.
بۇل قۇجاتقا قول قويۋ قازاقستاننىڭ بالا قۇقىقتارىن قامتاماسىز ەتۋگە جانە بالالاردى قۇقىقتىق قورعاۋدىڭ ۇلتتىق تەتىكتەرىن نىعايتۋعا بەيىلدىلىگىن راستايدى.
قۇجات قازاقستان رەسپۋبليكاسى ءۇشىن ونى پارلامەنت راتيفيكاسيالاعاننان كەيىن كۇشىنە ەنەدى.