ق ر مەملەكەتتىك ورتالىق مۋزەيىنىڭ «اتادان جەتكەن اسىل ءسوز» جوباسى اياسىندا «بابالار سوزىمەن» مۋزەيلىك ساباعى ءوتتى. ساباققا ب.مومىش ۇلى اتىنداعى №131 مەكتەپتىڭ 6 ا، ب سىنىپ وقۋشىلارى قاتىستى، دەپ حابارلايدى اlmaty-akshamy.kz.
وقۋشىلارعا ايتەكە ءبيدىڭ ناقىل سوزدەرى، بي-شەشەندەردىڭ تاريح ساحناسىنا شىققان ءداۋىرى، سالقام جاڭگىردىڭ ۇلى تاۋكە حاننىڭ تۇسىندا بولعان وقيعالار مەن «جەتى جارعى» زاڭدار جيناعى تۋرالى تانىمدىق اقپاراتتار ايتىلدى. سونىمەن قاتار، ەتنوگرافيالىق زالدىڭ قازاق حاندىعى ەكسپوزيسياسىنداعى جادىگەرلەر تانىستىرىلدى.
ساباق سوڭىندا ايتەكە ءبيدىڭ ناقىل سوزدەرى وقىلىپ، ماقال-ماتەلدەر قۇراستىرىلىپ، «بي» دەگەن كىم جانە ونىڭ بويىندا قانداي قاسيەتتەر بولۋ كەرەك دەگەن ساۋالعا جەكەلەگەن سوزدەردەن سويلەم قۇراستىرۋ ارقىلى جاۋاپ بەردى.
– ساباقتىڭ ماقساتى – قازاقتىڭ اتاقتى بيلەرى بۇگىنگى ۇرپاققا شەشەندىك سوزدەرىمەن، ادىلەتتى شەشىمدەرىمەن عانا ەمەس، ادامگەرشىلىككە، يماندىلىققا، يناباتتىلىققا باستايتىن ونەگەلى ومىرىمەن، بيىك پاراساتىمەن دە قىمبات تۇلعالار ەكەنىن ۇعىندىرۋ، – دەيدى ءدارىس جەتەكشىسى اقمارال قالداربەكوۆا.