بالالار اراسىندا تۇماۋ ءورشىپ تۇر

 رەسپۋبليكادا تۇماۋدىڭ ا جانە ب ۆيرۋسىنىڭ تارالىپ جاتقانى انىقتالدى.

بۇل تۋرالى بۇگىن دەنساۋلىق ساقتاۋ ۆيسە-مينيسترى – باس مەملەكەتتىك سانيتاريالىق دارىگەر ايجان ەسماعامبەتوۆا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«رەسپۋبليكامىزدا كوروناۆيرۋس ينفەكسياسى بويىنشا ەپيدەميولوگيالىق جاعداي تۇراقتى. بارلىق وڭىرلەر «جاسىل» ايماقتا. تاۋلىگىنە كوروناۆيرۋستىڭ 70-كە دەيىن جاعدايى تىركەلەدى. ناۋقاستاردىڭ 99 پايىزى ەمدەلگەن. كوروناۆيرۋس ينفەكسياسى بويىنشا تۇراقتى ەپيدەميولوگيالىق جاعدايعا قاراماستان، قازىرگى ۋاقىتتا ءجىتى رەسپەراتورلىق ۆيرۋستىق ينفەكسيا مەن تۇماۋدىڭ ەپيدەميالىق ماۋسىمى باستالدى»، - دەدى ۆيسە-مينيستر بۇگىن ورتالىق سايلاۋ كوميسسياسىنىڭ وتىرىسىندا.

ايجان ەسماعامبەتوۆانىڭ اتاپ وتۋىنشە، ولاردىڭ تارالۋ جولى كوراناۆيرۋس ينفەكسياسىمەن بىردەي، ياعني اۋا-تامشى جولىمەن بەرىلەدى.

«اعىمداعى ەپيدەميولوگيالىق ماۋسىمنىڭ باسىنان بەرى رەسپۋبليكامىزدا تۇماۋدىڭ 1 014 زەرتحانالىق راستالعان جاعدايى تىركەلدى. رەسپۋبليكادا تۇماۋدىڭ ا جانە ب ۆيرۋسىنىڭ اينالىمدا جۇرگەنى انىقتالدى. بۇدان باسقا بۇگىنگى كۇنى 1 ميلليوننان استام جرۆي تىركەلدى. سىرقاتتانۋشىلىق وتكەن جىلدىڭ وسى كەزەڭىمەن سالىستىرعاندا بىردەي دەڭگەيدە. اۋىرعانداردىڭ 60 پايىزى – 14 جاسقا دەيىنگى بالالار»، - دەدى ول.