بالالار اقشانى بەيبەرەكەت جۇمسامايتىن بولدى

ولاردىڭ كۇنىنە جۇمسايتىن اقشاسىنا شەك قويىلدى.

ۇلتتىق بانك بالالاردىڭ بانك كارتاسىن شەكتەۋگە قاتىستى شەشىم قابىلدادى، دەپ حابارلايدى Almaty-akshamy.kz

ون سەگىزگە تولماعان قازاقستاندىقتاردىڭ كۇنىنە جانە ايىنا قانشا اقشا جۇمساي الاتىنى، ياعني شەگى بەلگىلەنەدى. جاسوسكىندەرگە قاتىستى وزگە دە شەكتەۋلەر بار.

ۇلتتىق ستاتبيۋرو دەرەگىنشە، بيىلعى ءبىرىنشى جارتىجىلدىقتا 18 جاسقا دەيىنگى بالالاردىڭ سانى 6،7 ميلليون ادامنان استى. ياعني، ولاردىڭ ۇلەسى ەل حالقىنىڭ 34%-ىن قۇرايدى. بۇرىن جاس ۇرپاق جاناما تۇردە عانا بانكتەردىڭ كليەنتى بولاتىن: اتا-انالارى ولار ءۇشىن مەرزىمدى جانە جيناقتاۋشى دەپوزيتتەر، قۇرىلىس جيناق سالىمدارىن، نەمەسە ءبىلىم بەرۋ جيناقتاۋشى سالىمىن اشاتىن.

ايتا كەتەر جايت، ەلىمىزدەگى بارلىق بانك بىردەي شەكتەۋ قويماعان.

Halyk Bank-تىڭ بالالار كارتاسى ارقىلى 20 مىڭ تەڭگەنى شەشىپ الۋعا، كارتا ارقىلى وپەراسيالارعا 50 مىڭ تەڭگە باعىتتاۋعا بولادى.

Kaspi بانك بالالار كارتاسى ارقىلى كۇنىنە 10 مىڭ، ال ايىنا 100 مىڭ تەڭگە جۇمساۋعا رۇقسات ەتەدى.

سەنتركرەديت بانكى، RBK Bank، Altyn Bank اتا-انالارعا ءوز بالاسى ءۇشىن ءليميتتى ءوز بەتىنشە ورناتۋدى ۇسىنادى.

Jusan بانك بالالار كارتاسى ارقىلى ساتىپ الۋلارعا 100 مىڭ تەڭگە ارناۋعا، بانكوماتتان 20 مىڭ تەڭگە شەشىپ الۋعا، 100 مىڭ تەڭگەگە اۋدارما جاساۋعا مۇمكىندىك بەرەدى.

Forte Bank بالالارعا تاۋلىگىنە 50 مىڭ تەڭگەدەن شىعىنداۋعا جول بەرەدى.