«بالاجان: اتا-انالاردىڭ ەرىكتىلىگى»

وسىنداي اتاۋمەن حالىقارالىق بالالاردى قورعاۋ كۇنىنە وراي 27 مامىر-3 ماۋسىم ارالىعىندا ەلىمىزدە اكسيا وتەدى. 

وعان ءبىلىم بەرۋ ۇيىمدارىنىڭ جانىنداعى پەداگوگيكالىق قولداۋ ورتالىقتارىندا جاتتىققان بەلسەندى اتا-انالار قاتىسۋدا، دەپ حابارلايدى Almaty-akshamy.kz وقۋ-اعارتۋ مينيسترلىگىنە سىلتەمە جاساپ. 

ونىڭ ماقساتى – جايلى ءبىلىم بەرۋ ورتاسىن قالىپتاستىرۋ ءۇشىن اتا-انالار مەن پەداگوگتەردىڭ  ىنتىماقتاستىعىن قۇرۋ.

«اتا-انالار وزدەرىنىڭ ومىرلىك تاجىريبەلەرىن، بىلىمدەرىن، جاقسى قاسيەتتەرىن بالالاردىڭ بويىنا سىڭىرە الادى. ءىس-شارا اياسىندا ولاردىڭ كاسىبي جانە جەكە تاجىريبەلەرىن پايدالانا وتىرىپ، بالالارمەن كوبىرەك جۇمىس جاساۋىنا كوڭىل ءبولۋدى ۇسىنىپ وتىرمىز»، - دەيدى «وركەن» بالالاردىڭ ءال-اۋحاتىن ارتتىرۋ ۇلتتىق عىلىمي-پراكتيكالىق ينستيتۋتىنىڭ پرەزيدەنتى ەسەنعازى يمانعالييەۆ.

اكسيا باعدارلاماسىنا وتباسىلىق ءىس-شارالار، شەبەرلىك سىنىپتارى، سپورتتىق سايىستار، ترەنينگتەر، شىعارماشىلىق بايقاۋلار، ويىندار، ديالوگ الاڭدارى، كۆەستتەر، كەڭەس بەرۋلەر، جەكە سەسسيالار مەن باسقا دا كوپتەگەن شارالار ەنگىزىلگەن.

ايتا كەتەيىك، 2023 جىلدىڭ قىركۇيەگىنەن باستاپ ەلىمىزدىڭ ءبىلىم بەرۋ ۇيىمدارىندا اتا-انالاردى پەداگوگيكالىق قولداۋ ورتالىقتارى جۇمىس جاساۋدا. بۇل ورتالىقتارعا بۇگىنگە دەيىن 3،7 ملن قازاقتاندىق اتا-انا قاتىسىپ، وقۋ-جاتتىعۋدان ءوتتى.