بالاعات ءسوز ايتقان ايەل ايىپپۇل ارقالادى

وقيعا استانا-الماتى باعىتىنداعى اۋە رەيسى كەزىندە ورىن العان. 

دورەكىلىك تانىتىپ، بالاعات ءسوز سويلەگەن جولاۋشىعا 172 مىڭ تەڭگە ايىپپۇل سالىندى، دەپ حابارلايدى Almaty-akshamy.kz Elorda.info سايتىنا سىلتەمە جاساپ. 

«رەيسكە تىركەۋ كەزىندە جولاۋشى ايەل جەكە باسىن كۋالاندىراتىن قۇجات كورسەتپەگەن. بالاعات سوزدەر ايتقان. كولىك پوليسەيلەرى تەكسەرۋ كەزىندە ەلوردانىڭ 35 جاستاعى تۇرعىنىن انىقتادى. ول سونداي-اق پوليسيا بولمەسىنە جەتكىزۋ كەزىندە ءتارتىپ ساقشىلارىنىڭ زاڭدى تالابىنا باعىنباعان»، - دەپ جازىلعان حابارلامادا.

ايەلگە قاتىستى ق ر اقبتك-نىڭ 434-بابىنىڭ 1-بولىگى (ۇساق بۇزاقىلىق)، 667-بابىنىڭ 1-بولىگى (قۇقىق قورعاۋ ورگانى قىزمەتكەرىنىڭ زاڭدى وكىمىنە نەمەسە تالابىنا باعىنباۋ) بويىنشا اكىمشىلىك ماتەريالدار تولتىرىلىپ، استانا قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتىنا جولداندى. سوت شەشىمىمەن قۇقىق بۇزۋشىعا 50 اەك (172 500 تەڭگە) كولەمىندە ايىپپۇل سالىندى. 

ەستەرىڭىزگە سالا كەتەيىك، جىل باسىنان بەرى كولىك پوليسەيلەرى ءتۇرلى اكىمشىلىك قۇقىق بۇزۋشىلىقتار جاساعان 14 855 ادامدى جاۋاپكەرشىلىككە تارتتى. ونىڭ ىشىندە ۇساق بۇزاقىلىق 204 ادام، قۇقىق قورعاۋ ورگانى قىزمەتكەرىنىڭ زاڭدى وكىمىنە نەمەسە تالابىنا باعىنباعانى ءۇشىن 17 ادام جازالانعان.