بالادان اياپ، بۋكمەكەرگە بەرگەن

ەلوردا پروكۋراتۋراسى اليمەنت تولەۋدەن جالتارعان بورىشكەرلەردىڭ قۇمار ويىنداردىڭ قىزىعىنا باتىپ كەتكەندەردى انىقتادى، دەپ حابارلايدى aqshamnews.kz.

تالداۋ ناتيجەسىندە 150 بورىشكەردىڭ ءوز بالالارىنا 350 ملن تەڭگە قارىز بولا وتىرىپ، قۇمار ويىندارعا قاتىسقانى انىقتالدى.

اعىمداعى جىلى اليمەنت قارىزى 2،5 ملن تەڭگەنى قۇراعان بورىشكەرلەردىڭ ءبىرى بۋكمەكەرلىك كەڭسە ارقىلى 80 ملن تەڭگە جەكە اينالىممەن قۇمار ويىندارعا قاتىسقان.

پروكۋراتۋرانىڭ قاداعالاۋ اكتىسى بويىنشا جەكە سوت ورىنداۋشىلارى 150 بورىشكەرگە قۇمار ويىندارعا قاتىسۋعا تىيىم سالدى.

بۇل شەكتەۋدىڭ جاڭا ءتۇرى بورىشكەرلەردىڭ اقشانى ورىنسىز جۇمساۋىن بولدىرمايدى. 

2024 جىلعى 9 قىركۇيەكتە كۇشىنە ەنگەن قازاقستان رەسپۋبليكاسىنىڭ «ويىن بيزنەسى تۋرالى» زاڭىنا سايكەس، ەلوردا پروكۋراتۋراسى ويىن بيزنەسىنىڭ ۇيىمداستىرۋشىلارىنا بورىشكەرلەردى قۇمار ويىندارعا قاتىستىرماۋعا شاقىرادى.

قازاقستان رەسپۋبليكاسىنىڭ اكىمشىلىك قۇقىق بۇزۋشىلىقتار تۋرالى كودەكسىنىڭ 444-بابىنا سايكەس، اتالعان زاڭنامالىق تالاپتاردى ساقتاماعان جاعدايدا ايىپپۇل سالۋ، ال قايتالانعان بۇزۋشىلىقتار ءۇشىن - ليسەنزيانىڭ كۇشىن توقتاتۋ تۇرىندە جازا قاراستىرىلعانىن ەسكە سالامىز.