مامان تاپشىلىعىنا جالاقىنىڭ ازدىعى سەبەپ.
وقۋ-اعارتۋ مينيسترلىگى ەرتە جاستاعى بالالاردى دامىتۋ ينستيتۋتىنىڭ ديرەكتورى مانارا اداموۆانىڭ مالىمدەۋىنشە، مەكتەپكە دەيىنگى ۇيىمداردا 15 مىڭعا جۋىق تاربيەشى جەتىسپەيدى، دەپ حابارلايدى Almaty-akshamy.kz
"بۇگىنگى تاڭدا 15 مىڭداي تاربيەشى جەتىسپەيدى. ارينە، ءبىرىنشى سەبەبى، جاسىراتىنى جوق، جالاقىنىڭ ازدىعى. جالاقى از بولعاننان كەيىن جاس ماماندار تاراپىنان قىزىعۋشىلىق جوق. سودان كەيىن جۇمىس ىستەپ جۇرگەن ماماندار ءبىراز تاجىريبە جيناعاننان كەيىن ايلىعى كوپ مەكتەپكە اۋىسىپ كەتىپ جاتادى. اينالىپ كەلگەندە، بارلىعى جالاقىنىڭ ازدىعىنا بايلانىستى بولىپ تۇر"، - دەدى اداموۆا ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا.
ول بالاباقشا سانى كوپ وڭىرلەردە تاپشىلىق قاتتى سەزىلەتىنىن اتاپ ءوتتى. ولار تۇركىستان مەن الماتى وبلىستارى، استانا قالاسى.
ينستيتۋت ديرەكتورىنىڭ مالىمەتىنشە، قازاقستاندا 11 104 مەكتەپكە دەيىنگى ۇيىم بار. ونىڭ ىشىنە بالاباقشالار دا، شاعىن ورتالىقتار دا كىرەدى. ولاردا 1 ميلليوننان استام ءبۇلدىرشىن تاربيەلەنىپ جاتىر. بالاباقشالاردىڭ 70 پايىزى قازاق تىلىندە تاربيە بەرەدى.