بالاباقشالاردى ليسەنزيالاۋ ءتارتىبى قايتا ەنگىزىلەدى

باستى ماقسات – بالالاردىڭ قاۋىپسىزدىگىن قامتاماسىز ەتۋ.

مەملەكەت باسشىسى قاسىم-جومارت توقايەۆ بالاباقشالاردا بۇلدىرشىندەردى ۇرىپ-سوعۋ جاعدايلارىنىڭ كوبەيىپ كەتكەنىنە الاڭداپ، بالاباقشالاردى ليسەنزيالاۋ ءتارتىبىن قايتا ەنگىزۋدى تاپسىردى، دەپ حابارلايدى Almaty-akshamy.kz

«جەكەمەنشىك بالاباقشالاردا بالالاردى ۇرىپ-سوعۋ دەرەكتەرى بار. سونىمەن قاتار جۇمىس ىستەمەيتىن بالاباقشالارعا قارجى ءبولۋ كوبەيىپ كەتتى. مۇنىڭ ءبارى ولاردىڭ قىزمەتى اشىق ەمەس ەكەنىن، ازاماتتىق جاۋاپكەرشىلىگى جوقتىعىن كورسەتەدى. باسقاشا ايتقاندا، قوعام تالابىنا ساي ەمەس»، - دەدى پرەزيدەنت ۇكىمەتتىڭ كەڭەيتىلگەن وتىرىسىندا.

توقايەۆ 2011 جىلى بالاباقشالاردىڭ ليسەنزيا بويىنشا جۇمىس ىستەۋ ءتارتىبى توقتاتىلعانىن ەسكە سالدى. ايتۋىنشا، مەملەكەت بۇل قادامعا امالسىزدان بارعان. ويتكەنى مەكتەپ جاسىنا دەيىنگى بالالاردى بالاباقشامەن بارىنشا قامتۋ قاجەت بولدى.

- بۇل رەتتە، جەكە سەكتوردىڭ الەۋەتىن پايدالانۋ ماڭىزدى ەدى. ناتيجەسىندە 2 جانە 6 جاس ارالىعىنداعى بالالاردىڭ 88 پايىزدان استامى بالاباقشامەن قامتىلدى، - دەدى مەملەكەت باسشىسى. - ال ەندى قىزمەت كورسەتۋ ساپاسىن ارتتىراتىن كەز كەلدى. 

«ۇكىمەت وسى ماسەلەنى مۇقيات قاراستىرۋى كەرەك. ليسەنزيالاۋ ءتارتىبىن قايتا ەنگىزۋ، ەڭ الدىمەن، مەملەكەتكە ەمەس، قوعامعا قاجەت شارا. ويتكەنى باستى ماقسات – بالالاردىڭ قاۋىپسىزدىگىن قامتاماسىز ەتۋ»، - دەدى توقايەۆ.