اعىمداعى جىلدىڭ باسىنان ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ «Bala Qorgau» تەلەگرام-بوتىنا 500-گە جۋىق ءوتىنىش كەلىپ ءتۇستى.
سۇراقتاردىڭ باسىم بولىگى وتباسىنداعى جانجالدارعا، بالالار مەن پەداگوگتەر اراسىنداعى قارىم-قاتىناسقا، سونداي-اق جابىرلەۋگە قاتىستى بولدى، دەپ حابارلايدى اlmaty-akshamy.kz.
«بالالاردىڭ قۇقىقتارىن قورعاۋ كوميتەتى ءاربىر وتىنىشكە باسا دەن قويىپ، ءاربىر ماسەلەنى تولىق شەشىلگەنگە دەيىن مۇقيات قاداعالايدى. بارلىق سۇرانىستار تاۋلىك بويى وڭدەلەدى. اتا-انالار مەن بالالاردىڭ قۇقىقتىق جانە پسيحولوگيالىق كومەككە مۇقتاج ەكەنى بايقالادى. بالالارعا پسيحولوگيالىق قولداۋ شۇعىل تۇردە قاجەت ەكەنى انىق. كوپتەگەن جۇمىس باستى اتا-انالار بالالارىنا جەتكىلىكتى تۇردە ۋاقىت پەن كوڭىل بولمەيتىنى انىق. وسىعان وراي كوميتەت اتا-انالاردى بالالارمەن تىعىز قارىم-قاتىناس قۇرىپ، بارىنشا كوپ ۋاقىت بولۋگە شاقىرادى. بۇل قايعىلى جاعداي مەن وقىس وقيعالاردىڭ الدىن الۋ ءۇشىن ماڭىزدى»، - دەپ جەتكىزدى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.
ايتا كەتەيىك، اتالعان باعىتتاعى جۇمىس جالعاسىن تاپپاق. بۇگىندە اركىم «Bala Qorgau» چاتىنا جۇگىنە الادى، ونىڭ QR-كودى بارلىق ءبىلىم بەرۋ ۇيىمدارىندا ورنالاستىرىلعان. بۇل رەسۋرس مەكتەپتە، ۇيدە جانە كوشەدە قيىندىقتارعا تاپ بولعان وقۋشىلار مەن ولاردىڭ اتا-انالارىنا كومەكتەسۋگە باعىتتالعان.