بيىل -بالالار جىلى.
وسىعان وراي ەلىمىزدە بالالاردىڭ باقىتتى بولاشاعى ءۇشىن كوپتەگەن ءىس-شارالار قولعا الىنىپ، ولاردىڭ دەنساۋلىعى مەن ءومىرىن جاقسارتۋعا ايرىقشا ءمان بەرىلۋدە. ال دەنى ساۋ بالا تەك ءبىر اۋلەتتىڭ عانا ەمەس، قوعامنىڭ دا باستى بايلىعى ەكەنى ايتپاسا دا تۇسىنىكتى. مىنە، وسىعان وراي الماتى قالالىق №29 ەمحانانىڭ پەدياتريالىق ءبولىمى 1 ماۋسىم - حالىقارالىق بالالاردى قورعاۋ كۇنىنە وراي «بالا– ءبىزدىڭ باستى بايلىعىمىز!» دەگەن ۇندەۋمەن بالالارعا ارنالعان اشىق ەسىك كۇنىن ۇيىمداستىرۋدا.
"اشىق ەسىك كۇنى اياسىندا جاڭا تۋىلعان نارەستەدەن باستاپ 14 جاسقا دەيىنگى جاسوسپىرىمدەر تولىق دارىگەرلىك تەكسەرۋدەن وتكىزىلىپ، قانداي دا ءبىر سىرقاتى انىقتالعاندارى ديسپانسەرلىك ەسەپكە الىنادى. ال ەمدەۋ-ساۋىقتىرۋ قاجەتتىلىگى تۋىنداعان بالالارعا قالامىزداعى مامانداندىرىلعان اۋرۋحانالار مەن شيپاجايلارعا جولداما بەرىلەدى"، - دەيدى ەمحانانىڭ باس دارىگەرى اقميرا سادىقوۆا.
قازىرگى تاڭدا بۇل ەمحانادا 52 مىڭنان استام قالا تۇرعىندارى ەسەپتە تۇرسا، ونىڭ 23 مىڭ 200-دەن استامى بالا. ون ءتورت جاسقا دەيىنگى بالالار سانى 21 مىڭدى قۇرايدى. ەسەپتە تۇرعان ءار بالا ءتيىستى مامان دارىگەرلەردىڭ باقىلاۋىندا. وسى رەتتە №29 ەمحانا قالامىزداعى پەدياترلىق ءبولىمدى ساقتاپ وتىرعان بىردەن-بىر العاشقى دارىگەرلىك كومەك كورسەتەتىن ۇجىم ەكەنىن اتاپ كەتكەن ءجون. بۇگىندە ەمحانادا 5 پەدياترلىق ۋچاسكە جۇمىس ىستەيدى.