«بالا – باۋىر ەتىڭ»

جازاسىن وتەپ، اباقتىدا وتىرعان ەر ادام اۋرۋ بالاسىنا بۇيرەگىن بەرگەن

قاج كوميتەتى مەديسينالىق قامتاماسىز ەتۋ ءبولىمىنىڭ قىزمەتكەرى گۇلجان مۇسابايەۆا پەنيتەنسيارلىق جۇيەنىڭ تاريحىندا ءبىرىنشى رەت بولعان بۇيرەك ترانسپلانتاسياسى تۋرالى ايتتى، دەپ حابارلايدى almaty-akshamy.kz Polisa.kz سىلتەمە جاساپ.

ول جۇمىس بارىسىندا سوتتالعاندار مەن ولاردىڭ تۋىستارىنىڭ دا كوپتەگەن ءوتىنىشىن قارايدى. ماسەلەن، 2018 جىلدىڭ ءساۋىر ايىندا كوميتەتكە جازاسىن وتەپ جاتقانداردىڭ ءبىرىنىڭ جۇبايى شۇعىل تۇردە بۇيرەك ترانسپلانتاسياسىن قاجەت ەتەتىن ءتورت جاسار ۇلىنا دونور كەرەك ەكەنىن ايتىپ، حات جازعان.

گۇلجان مۇسابايەۆانىڭ ايتۋىنشا، ول ۋاقىتتا بالانىڭ تۋعان اكەسى شىعىس قازاقستان وبلىسى بويىنشا قاج دەپارتامەنتىنە قاراستى ورتاشا ءقاۋىپسىز مەكەمەدە جازاسىن وتەپ جاتتى.

«بالانىڭ مۇشكىل ءحالىن ەسكەرىپ، ءبىز دەرەۋ جازاسىن وتەپ جاتقان ەر ادامدى ءتيىستى ساراپتامالاردان وتكىزدىك. بىزگە انا مەن بالا ۇلتتىق عىلىمي ورتالىعى كومەكتەستى. سوتتالۋشىنى استاناعا جەتكىزۋگە جازاسىن وتەپ جاتقان مەكەمەنىڭ جانە قاج كوميتەتى قىزمەتكەرلەرى كومەكتەستى. اكەسى بالاسىنا بۇيرەگىن بەردى. وتا ءساتتى ءوتتى. سوتتالعان ەر ادامدى جازاسىن ودان ءارى وتەۋ ءۇشىن كولونياعا قايتا اكەلدىك، – دەدى مۇسابايەۆا.

ءبىر بۇيرەگىن بالاسىنا بەرگەن ەر ادام جازاسىن وتەپ، بىلتىر بوستاندىققا شىقتى.