2-5 جەلتوقسان ارالىعىندا ازەربايجان رەسپۋبليكاسىندا قازاقستان رەسپۋبليكاسىنىڭ مادەنيەت كۇندەرى وتۋدە.
بۇعان دەيىن ازەربايجان پرەزيدەنتى يلحام الييەۆتىڭ قازاقستانعا رەسمي ساپارى بارىسىندا مەملەكەت باسشىسى قاسىم-جومارت توقايەۆ مادەنيەت سالاسىنداعى ءوزارا ءىس-قيمىل جانە قازاق-ازەربايجان قارىم-قاتىناستارىن نىعايتۋدا ەرەكشە ءرول اتقاراتىنىن اتاپ وتكەن بولاتىن. سونداي-اق، ءىسساپار بارىسىندا ەكى ەلدىڭ مادەنيەت كۇندەرىن وتكىزۋ تۋرالى كەلىسىمگە قول قويىلدى، دەپ حابارلايدى Almaty-akshamy.kz.
باكۋ قالاسىندا باستالعان ءىس-شارالار حالىقتاردى جاقىنداستىرىپ، ولاردىڭ تەرەڭ تاريحى مەن باي مادەنيەتىن پاش ەتەدى.
مادەنيەت كۇندەرى اياسىندا بۇگىن «HasSak» فولكلورلى-ەتنوگرافيالىق ءانسامبلىنىڭ جەكە كونسەرتى ءوتتى. شىعارماشىلىق ۇجىم سوڭعى 10 جىل ىشىندە قازاقتىڭ ءداستۇرلى مۋزىكاسىنىڭ قايتالانباس جانرلارىن زامان اعىمىنا ساي جاڭعىرتىپ، ۇلتتىق اسپاپتاردا ورىنداۋ ارقىلى ءداستۇرلى ونەردى دارىپتەپ كەلەدى.
سونداي-اق، باكۋ قالاسىنىڭ تۇرعىندارى مەن قوناقتارى عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ «قاراگوز» قويىلىمىن تاماشالاي الادى.
نەگىزگى ءىس-شارالار 4 جەلتوقسانعا جوسپارلانىپ وتىر. بۇل كۇنى ق ر مادەنيەت جانە اقپارات ءمينيسترى ايدا بالايەۆانىڭ قاتىسۋىمەن قازاقستاننىڭ بەينەلەۋ ونەرى كورمەسىنىڭ اشىلۋ سالتاناتى وتەدى. كورمەدە ءارتۇرلى جانرلار مەن ستيلدەردە جۇمىس ىستەيتىن قازاقستاندىق سۋرەتشىلەردىڭ 46 بىرەگەي تۋىندىسى قويىلادى. قىلقالام شەبەرلەرىنىڭ ءاربىر جۇمىسى – قازاق ونەرى مەن مادەنيەتىنە جاڭاشا كوزقاراستى كورسەتەدى.
مادەنيەت كۇندەرىن قازاقستان ونەر مايتالماندارىنىڭ گالا-كونسەرتى قورىتىندىلايدى. ءىس-شاراعا قازاقستاننىڭ ەڭبەك ەرى روزا رىمبايەۆا، «قۇرمەت» وردەنىنىڭ يەگەرى زارينا التىنبايەۆا، قازاقستاننىڭ ەڭبەك سىڭىرگەن قايراتكەرلەرى: الىشەر كاريموۆ، مەدەت چوتابايەۆ، ايگەرىم بەكەتايەۆا، «IL Canto»، «Violas»، «T&Y» توپتارى مەن «ۇلىتاۋ»، «سازگەن سازى» جانە «سالتانات» مەملەكەتتىك بي ءانسامبلى، سونداي-اق، «فيكرەت اميروۆ اتىنداعى ازەربايجان مەملەكەتتىك ءان-بي ءانسامبلى» قاتىسادى.
ايتا كەتەيىك، 2024 جىلى قازاقستاندا ازەربايجاننىڭ مادەنيەت كۇندەرىن وتكىزۋ جوسپارلانىپ وتىر.