2025 جىلعى 4 ناۋرىزدا ازەربايجان استاناسى باكۋدە قازاقستاننىڭ جەتەكشى ۋنيۆەرسيتەتتەرى قاتىسقان ءبىلىم كورمەسى ءوتتى. ءىس-شارا بارىسىندا ازەربايجاندىق جوعارى سىنىپ وقۋشىلارى مەن ستۋدەنتتەرگە قازاقستاننىڭ ءبىلىم بەرۋ جۇيەسى، اكادەميالىق باعدارلامالارى جانە جوعارى وقۋ ورىندارىنىڭ مۇمكىندىكتەرى تانىستىرىلدى، دەپ حابارلايدى aqshamnews.kz
كورمەگە قازاقستاننىڭ 23 ۋنيۆەرسيتەتى قاتىسىپ، ولاردىڭ قاتارىندا الماتى قالاسىنىڭ بەدەلدى جوعارى وقۋ ورىندارى دا بولدى. اتاپ ايتقاندا:
- قازاق ۇلتتىق قىزدار پەداگوگيكالىق ۋنيۆەرسيتەتى
- ق.ي. ساتبايەۆ اتىنداعى قازاق ۇلتتىق زەرتتەۋ تەحنيكالىق ۋنيۆەرسيتەتى
- گۋماربەك داۋكەيەۆ اتىنداعى الماتى ەنەرگەتيكا جانە بايلانىس ۋنيۆەرسيتەتى
- Almaty Management University (AlmaU)
- SDU ۋنيۆەرسيتەتى
- تۇران ۋنيۆەرسيتەتى
ءىس-شارانىڭ اشىلۋىندا قازاقستان رەسپۋبليكاسىنىڭ ازەربايجانداعى ەلشىسى ءالىم بايەل ءسوز سويلەپ، بۇل كورمەنىڭ ەكى ەل اراسىنداعى ءبىلىم بەرۋ ىنتىماقتاستىعىن جاڭا دەڭگەيگە كوتەرەتىنىن اتاپ ءوتتى. ونىڭ ايتۋىنشا، قازاقستان مەن ازەربايجان بۇگىندە تەك سەرىكتەس ەلدەر عانا ەمەس، شىنايى وداقتاستارعا اينالدى. بۇل ارىپتەستىك جوعارى ءبىلىم مەن عىلىم سالاسىندا دا قارقىندى دامىپ كەلەدى.
كورمە اياسىندا دەمەۋشىلەردىڭ قولداۋىمەن ارنايى ۇتىس ويىندارى ۇيىمداستىرىلىپ، جەڭىمپازدارعا قازاقستانعا تەگىن اۆيابيلەتتەر، كىتاپ دۇكەندەرىنە سەرتيفيكاتتار، فيتنەس-زالعا ابونەمەنتتەر جانە قۇندى سىيلىقتار تابىستالدى. سونىمەن قاتار، قازاقتىڭ ۇلتتىق تاعامدارى مەن قولونەر بۇيىمدارى ۇسىنىلعان قايىرىمدىلىق جارمەڭكەسى ءوتتى.
سول كۇنى ادا ۋنيۆەرسيتەتىندە قازاقستان مەن ازەربايجاننىڭ جەتەكشى جوعارى وقۋ ورىندارىنىڭ باسشىلارى قاتىسقان دوڭگەلەك ۇستەل ۇيىمداستىرىلدى. وتىرىستا قازاقستاننىڭ عىلىم جانە جوعارى ءبىلىم ءمينيسترى ساياسات نۇربەك پەن ازەربايجاننىڭ عىلىم جانە ءبىلىم ءمينيسترى ەمين امرۋللايەۆ ءسوز سويلەپ، ەكى ەلدىڭ جوعارى ءبىلىم سالاسىنداعى ىنتىماقتاستىقتى ودان ءارى نىعايتۋعا نيەتتى ەكەنىن جەتكىزدى.
ساياسات نۇربەك قازاقستاندا جوعارى ءبىلىم مەن عىلىم سالاسىندا اۋقىمدى رەفورمالار جۇرگىزىلىپ جاتقانىن اتاپ ءوتتى. ونىڭ ايتۋىنشا، ەلىمىز ايماقتىق ءبىلىم بەرۋ حابىنا اينالىپ، بەدەلدى شەتەلدىك ۋنيۆەرسيتەتتەر ءوز فيليالدارىن اشۋدا. 2024 جىلى قازاقستاندا 31 مىڭنان استام شەتەلدىك ستۋدەنت ءبىلىم العان، ال جاس عالىمدارعا قولداۋ كورسەتۋ مەن عىلىمي زەرتتەۋلەردى كوممەرسيالاندىرۋ جۇمىستارى جۇيەلى تۇردە جۇزەگە اسىرىلۋدا.
ءوز كەزەگىندە، ەمين امرۋللايەۆ ازەربايجاننىڭ قازاقستانمەن جوعارى ءبىلىم جانە عىلىم سالاسىنداعى سەرىكتەستىكتى تەرەڭدەتۋگە مۇددەلى ەكەنىن مالىمدەدى. ول ءبىلىم بەرۋ ستراتەگيالارى، ۋنيۆەرسيتەتتەر اراسىنداعى ىنتىماقتاستىق پەن يننوۆاسيالىق تاسىلدەردى ەنگىزۋ باعىتىندا بەلسەندى جۇمىس اتقارىلىپ جاتقانىن ايتتى.
دوڭگەلەك ۇستەل قورىتىندىسى بويىنشا قازاقستاندىق جانە ازەربايجاندىق ۋنيۆەرسيتەتتەر اراسىندا 40 ءوزارا تۇسىنىستىك مەموراندۋمىنا قول قويىلدى. مينيسترلەر اكادەميالىق ۇتقىرلىقتى دامىتۋ، بىرلەسكەن عىلىمي زەرتتەۋلەر جۇرگىزۋ جانە ءبىلىم سالاسىنداعى ىنتىماقتاستىقتى كەڭەيتۋ ماسەلەلەرىنە باسا نازار اۋدارۋعا ۋاعدالاستى.
سونىمەن قاتار، قازاقستاننىڭ عىلىم جانە جوعارى ءبىلىم مينيسترلىگى مەن ازەربايجاننىڭ جوعارى اتتەستاتتاۋ كوميسسياسى اراسىندا عىلىمي جاريالانىمداردى ىنتىماقتاستىق اياسىندا ازىرلەۋگە قاتىستى ماڭىزدى كەلىسىم جاسالدى. بۇل كەلىسىم 2025 جىلعى 3 ناۋرىزدا قازاقستان پرەمەر-مينيسترىنىڭ ازەربايجانعا رەسمي ساپارى بارىسىندا بەكىتىلگەن بولاتىن.
بۇل ءبىلىم كورمەسى مەن دوڭگەلەك ۇستەل ەكى ەل اراسىنداعى عىلىمي جانە اكادەميالىق بايلانىستاردى نىعايتۋعا ۇلكەن سەرپىن بەرىپ، قازاقستان مەن ازەربايجاننىڭ جوعارى ءبىلىم سالاسىنداعى ارىپتەستىگىن جاڭا دەڭگەيگە كوتەرەدى