قازاقستاننىڭ ازەربايجانداعى ەلشىلىگىندە باكۋدا تۇراتىن قازاقستان ازاماتتارى مەن قازاق بىلىمگەرلەرىنىڭ باسقوسۋى ءوتتى، دەپ حابارلايدى aqshamnews.kz
قازاقستان رەسپۋبليكاسىنىڭ ازەربايجانداعى ەلشىسى ءالىم بايەل ءوز سوزىندە ەلىمىزدىڭ تاۋەلسىزدىك كەزەڭىندەگى جەتىستىكتەرىنە توقتالىپ، مەملەكەتتىڭ سىرتقى جانە ىشكى ساياساتىنىڭ نەگىزگى باعىتتارى تۋرالى ايتىپ بەردى.
ديپلومات قازاقستاننىڭ ازەربايجانمەن ساياسي، ەكونوميكالىق، كولىك-لوگيستيكالىق، قورعانىس، ءبىلىم، مادەني جانە تۋريستتىك سالالارداعى ىنتىماقتاستىعىنىڭ وڭ ديناميكاسىن اتاپ ءوتتى. قازاقستان مەن ازەربايجان ىسكە اسىرىپ جاتقان ءىرى وڭىرلىك جوبالاردىڭ ماڭىزدىلىعىنا نازار اۋداردى. ولاردىڭ اراسىندا ورتا ءدالىزدى دامىتۋ، كاسپيي تەڭىزى ارقىلى ينتەرنەت جەلىسىن جانە ەلەكتروكابەلدى تارتۋ بار.
ەلشى 2023 جىلعى قاراشا مەن 2024 جىلعى قاراشا ارالىعىندا مەملەكەت باسشىسى قاسىم-جومارت توقايەۆتىڭ ازەربايجانعا ساپارمەن ءتورت رەت كەلگەنىن، مۇنداي قارقىننىڭ ەكىجاقتى قارىم-قاتىناستارىمىزدىڭ تاريحىندا بۇرىن بولماعانىن اتاپ ءوتتى. سونىمەن قاتار، ءا.بايەل قازاقستاننىڭ باستى بايلىعى ونىڭ ازاماتتارى ەكەنىن جانە ەلشىلىكتىڭ قازاقستاندىقتار ءۇشىن ءاردايىم اشىق ەكەندىگىن ايتتى.
ءىس-شارا اياسىندا ازەربايجاننىڭ جەتەكشى جوعارى وقۋ ورىندارىندا وقيتىن ستۋدەنتتەر «وردا» قازاق جاستارىنىڭ ۇيىمىن قۇردى. ۇيىمنىڭ ماقساتى ازەربايجانداعى قازاق ستۋدەنتتەرىن بىرىكتىرۋ جانە قولداۋ، مادەني بايلانىستاردى نىعايتۋ مەن ءتۇرلى ءىس-شارالار وتكىزۋ بولماق.
وسى تۇرعىدا ەلشى ءا.بايەل التىن وردانىڭ 800-جىلدىعىنا ورايلاستىرىلىپ قۇرىلعان جاستار ۇيىمى اتاۋىنىڭ سيمۆولدىق ءمانىن اتاپ ءوتتى. ونىڭ اتۋىنشا، مەملەكەتارالىق ىنتىماقتاستىقتى كۇشەيتۋدىڭ ءبىر جولى – ازاماتتار اراسىنداعى بايلانىستار مەن دوستىقتىڭ دامۋى. وسى تۇرعىداعى وڭ كورسەتكىشتەردىڭ ءبىرى – ازەربايجاندا قازاق تۋريستتەرى مەن ستۋدەنتتەرى سانىنىڭ ارتۋى.
كەيىنىرەك وتانداستار ۇلتتىق مۋزىكانى تىڭداپ، ۇلتتىق تاعامداردان ءدام تاتتى.