2023 جىلعى 22 قىركۇيەكتە ازەربايجان ۇلتتىق كىتاپحاناسىندا كورنەكتى جازۋشى، قازاق ادەبيەتىندەگى دەتەكتيۆ جانرىنىڭ نەگىزىن قالاۋشى، دراماتۋرگ، قوعام قايراتكەرى كەمەل توقايەۆتىڭ 100-جىلدىعىنا جانە حح عاسىرداعى ازەربايجان ادەبيەتىنىڭ كلاسسيگى، عالىم-پەداگوگ مير جالال پاشايەۆتىڭ 115-جىلدىعىنا ارنالعان «تۇركى ادەبيەتىنىڭ تارلاندارى» اتتى حالىقارالىق كونفەرەنسيا ءوتتى، دەپ حابارلايدى almaty-akshamy.kz.
ءىس-شاراعا ازەربايجان مادەنيەت ءمينيسترى ءادىل كەريملي، قازاقستان رەسپۋبليكاسى پرەزيدەنتىنىڭ كەڭەسشىسى مالىك وتاربايەۆ، قازاقستاننىڭ ازەربايجانداعى ەلشىسى ءالىم بايەل، ازەربايجاننىڭ ميللي ءماجىلىسى مادەنيەت كوميتەتىنىڭ ءتورايىمى گانيرا پاشايەۆا، ازەربايجان ۇلتتىق عىلىم اكادەمياسىنىڭ پرەزيدەنتى يسا گابيببەيلي، ازەربايجان ديپلوماتيالىق اكادەمياسىنىڭ رەكتورى حافيز پاشايەۆ، ازەربايجان ۇلتتىق كىتاپحاناسىنىڭ ديرەكتورى كارىم تاحيروۆ، قازاقستان ۇلتتىق كىتاپحاناسىنىڭ ديرەكتورى باقىتجامال وسپانوۆا، سونداي-اق چينگيز ابدۋللايەۆ، قويشىعۇل زارلى، باقتىعالي ايجىگىتوۆ، باقىت قۇتپانبايەۆ، سايات قامشىگەر، تالانت ارىنعالي، نۇرعالي وراز، قادىربەك قانىپيا ۇلى، تاحسين مۋتالليبوۆ، ناريمان ابدۋلراحمانلى جانە ت.ب. سياقتى كورنەكتى قازاقستاندىق جانە ازەربايجاندىق عىلىم، ادەبيەت جانە ونەر قايراتكەرلەرى قاتىستى.
كونفەرەنسيا بارىسىندا قاتىسۋشىلار ك.توقايەۆ پەن م.پاشايەۆتىڭ ءومىرى مەن شىعارماشىلىق جولى تۋرالى باياندامالار جاساپ، ءوزارا مادەني ىقپالداستىق ارقىلى تۇركى حالىقتارىن ودان ءارى جاقىنداستىرۋدىڭ ماڭىزدىلىعى تۋرالى پىكىرلەرىمەن ءبولىستى.
ءىس-شارا اياسىندا ك.توقايەۆتىڭ ازەربايجان تىلىندە جارىق كورگەن «تۇندە اتىلعان وق» كىتابى مەن م.پاشايەۆتىڭ قازاق تىلىندە باسىلىپ شىققان «تاۋلاردىڭ جۇرەگى» كىتابىنىڭ تۇساۋكەسەرى ءوتتى. تۇركى الەمىنىڭ كوركەم ءسوز شەبەرلەرى شىعارمالار جيناعىنىڭ تۇساۋكەسەرىمەن قاتار، ولاردىڭ شىعارماشىلىعىنا ارنالعان كىتابي-يلليۋستراسيالىق كورمە ۇيىمداستىرىلدى.
م.وتاربايەۆ ءىس-شارانىڭ وتۋىنە بايلانىستى قازاقستان رەسپۋبليكاسى پرەزيدەنتىنىڭ قۇتتىقتاۋ حاتىن وقىپ، ونى ازەربايجان تاراپىنا تاپسىردى. مەملەكەت باسشىسىنىڭ حاتىندا «قازاق پەن ازەربايجان – ەجەلدەن تۋىس، دوس حالىقتار. باۋىرلاس ەلدەردىڭ قارىم-قاتىناسىن نىعايتۋعا كاسپيي تەڭىزى ارقىلى جالعاسىپ جاتقان تاتۋ كورشىلىك پەن ەكونوميكالىق ىنتىماقتاستىق قانا ەمەس، ءقادىرلى قالامگەرلەرىمىز بەن كورنەكتى تۇلعالارىمىزدىڭ رۋحاني بايلانىستارى دا زور سەپتىگىن تيگىزىپ كەلەدى»، - دەپ ايتىلعان.
ازەربايجان مادەنيەت ءمينيسترى ءا.كەريملي ازەربايجان ۇلتتىق كىتاپحاناسىنىڭ 100-جىلدىعىن مەرەكەلەۋمەن قاتار ءوتىپ جاتقان كونفەرەنسيانىڭ ەكى ەلدىڭ ادەبيەتى مەن مادەنيەتى ءۇشىن ماڭىزدىلىعىن اتاپ ءوتتى.
ەلشى ءا. بايەل ءوز سوزىندە قازاقستاننىڭ قاشاندا ازەربايجانمەن بىرگە بولاتىنىن مالىمدەدى. سونىمەن قاتار، ديپلومات پرەزيدەنت ق.توقايەۆ پەن پرەزيدەنت ي. الييەۆ اراسىنداعى سەنىمدى ديالوگتىڭ ارقاسىندا ەلدەرىمىز اراسىنداعى جان-جاقتى ىنتىماقتاستىقتىڭ جاڭا دەڭگەيگە شىعىپ وتىرعانىن اتاپ ءوتتى.
ميللي ءماجىلىس مادەنيەت كوميتەتىنىڭ ءتورايىمى گ. پاشايەۆا ءوز سوزىندە قازاقستان مەن ازەربايجاننىڭ باۋىرلاس حالىقتارى اراسىنداعى ورتاق تاريحي تامىرلار، سونداي-اق ەكى ەلدىڭ مادەني ىنتىماقتاستىعى تۋرالى ايتىپ بەردى. دەپۋتات ك.توقايەۆتىڭ ازەربايجان تىلىندەگى كىتابى مەن م. پاشايەۆتىڭ قازاق تىلىندەگى كىتابىنىڭ تۇساۋكەسەرىن قازاق مەن ازەربايجان حالىقتارى اراسىنداعى دوستىقتىڭ جارقىن ۇلگىسى دەپ اتادى.
كەمەل توقايەۆتىڭ ازەربايجان تىلىندەگى كىتابىنا العى ءسوز جازعان دەتەكتيۆ جانرىنىڭ شەبەرى چ.ابدۋللايەۆ توقايەۆ بيوگرافياسىنىڭ تاڭقالارلىق تۇستارىنا توقتالدى.
ۇلتتىق عىلىم اكادەمياسىنىڭ پرەزيدەنتى ي. گابيببەيلي قوس جازۋشى تاعدىرىنىڭ ۇقساستىعىنا نازار اۋداردى: ەكەۋى دە اتا-اناسىنان ەرتە ايرىلىپ، اعالارىنىڭ قامقورلىعىمەن ەر جەتتى. ەكەۋى دە ادامگەرشىلىك پەن وتانشىلدىق سياقتى قۇندىلىقتاردى دارىپتەپ، مايدانگەرلەردىڭ ءومىرىن سۋرەتتەدى.
كونفەرەنسيا سوڭىندا ەكى ەلدىڭ ۇلتتىق كىتاپحانالارىنىڭ باسشىلارى قازاقستاننىڭ ازەربايجانداعى ەلشىلىگىنە ءىس-شارانى ۇيىمداستىرۋعا قولداۋ كورسەتكەنى ءۇشىن ريزاشىلىقتارىن ءبىلدىردى، سونداي-اق قوناقتارعا ءىس-شاراعا قاتىسقاندارى جانە تۇركى الەمىنىڭ مادەني بايلانىستارىن دامىتۋعا قوسىپ وتىرعان ۇلەستەرى ءۇشىن العىس ءبىلدىردى
