تۇنگى كلۋب ەكى اپتا بۇرىن اشىلعان
ازەربايجان استاناسىنىڭ ورتالىعىندا LocationBaku تۇنگى كلۋبىندا جويقىن جارىلىس بولدى. قازا تاپقاندار مەن جارالىلار بار، – دەپ حابارلايدى Almaty-akshamy.kz Tengrinews.kz-كە سىلتەمە جاساپ.
پورتال مالىمەتىنشە، مەكەمە ەكى اپتا بۇرىن اشىلعان.
«العاشقى نۇسقالارعا سايكەس، گازدان جارىلىس بولدى. وقيعا ورنىندا ءىىم قىزمەتكەرلەرى جۇمىس ىستەپ جاتىر. تەرگەۋ امالدارى باستالدى. قازا بولعاندار مەن جارالانعانداردىڭ سانى انىقتالىپ جاتىر»، – دەدى ازەربايجان ءىىم باسپا ءسوز قىزمەتىنىڭ باسشىسى ەحسان زاحيدوۆ.
ال دەنساۋلىق ساقتاۋ مينيسترلىگى باكۋ اۋرۋحانالارىنا 24 ادام – 13 ەر ادام جانە 11 ايەل جەتكىزىلگەنىن حابارلادى. ولاردىڭ كوبىن كۇيىك شالعان.
«الدىن الا مالىمەتتەر بويىنشا، تۇنگى كلۋبتاعى جارىلىس سالدارىنان ءۇش ادام قايتىس بولدى»، – دەدى جەدەل جاردەم قىزمەتكەرلەرى haqqin.az تىلشىلەرىنە.
وقيعا ورنىنا قالا باسشىسى ەلدار ازيزوۆ پەن توتەنشە جاعدايلار ءمينيسترىنىڭ ورىنباسارى ەتيبار ميرزويەۆ كەلدى.
قازىرگى ۋاقىتتا وقيعا ورنىندا ءىىم جانە تجم قىزمەتكەرلەرى جۇمىس ىستەپ جاتىر.