وتىرىستا 2023 جىلعا ارنالعان ينۆەستيسيالىق ساياسات تالاپتارىنىڭ ورىندالۋ بارىسى تۋرالى اقپارات ۇسىنىلدى. حولدينگتىڭ ەنشىلەس ۇيىمدارى ەكونوميكانىڭ شيكىزاتتىق ەمەس سالالارىنىڭ كاسىپورىندارىنا جالپى سوماسى 2،8 ترلن تەڭگە كولەمىندە قولداۋ كورسەتتى، بۇل الدىڭعى جىلمەن سالىستىرعاندا 45%-عا ارتىق. كۆازيمەملەكەتتىك سەكتور سۋبەكتىلەرىنە جاتپايتىن 71 مىڭنان استام كومپانيا مەن ۇيىمعا 2،5 ترلن تەڭگە كولەمىندە قولداۋ كورسەتىلدى. 2023 جىلى اوك سالاسىن قارجىلاندىرۋدىڭ جالپى كولەمى 665،2 ملرد تەڭگەنى قۇرادى. حولدينگتىڭ قولداۋ شارالارىنىڭ ارقاسىندا 6 مىڭنان استام جاڭا جۇمىس ورنى قۇرىلىپ، 3،8 ترلن تەڭگەنىڭ ءونىمى شىعارىلدى جانە قىزمەتتەر كورسەتىلدى.

ەسەپتەردى تىڭداعان ۇكىمەت باسشىسى «بايتەرەك» ساتىپالىم ەرەجەلەرىن وتاندىق تاۋارلاردىڭ ۇلەسىن تۇبەگەيلى ارتتىرۋ جاعىنا قاراي قىسقا مەرزىمدە قايتا قاراۋ قاجەتتىگىن اتاپ ءوتتى.

سونىمەن قاتار مەملەكەتتىك قولداۋعا يە بولعان كاسىپورىندار ەلىشىلىك قۇندىلىقتى ۇنەمى ارتتىرىپ وتىرۋى كەرەك.

«ءبىز “بايتەرەك” حولدينگى جانە باسقا دا دامۋ ينستيتۋتتارى ارقىلى ەكونوميكانىڭ بەلگىلى ءبىر كاسىپورىندارى مەن سالالارىن قولداۋعا قوماقتى قاراجات ءبولىپ وتىرمىز. سوندىقتان بارلىق ءىس-شارا ەلىشىلىك قۇندىلىقتىڭ ارتۋىنا ىقپال ەتۋى كەرەك. ەگەر ءبىز كاسىپكەرگە قولداۋ كورسەتەر بولساق، ول قازاقستاندا ءقازىر يمپورتتاپ وتىرعان تاۋارلاردىڭ ءوندىرىسىن جولعا قويۋ، جۇمىسكەرلەردىڭ ەڭبەك ونىمدىلىگى مەن جالاقى دەڭگەيىن ارتتىرۋ، قوسالقى مەردىگەرلەر نەمەسە جەتكىزۋشىلەر رەتىندە وتاندىق كاسىپورىنداردى تارتۋ سياقتى قارسى مىندەتتەمەلەردى دە وزىنە الۋى ءتيىس»، — دەدى ولجاس بەكتەنوۆ.

پرەمەر-مينيستر قازىرگى ۋاقىتتا ۇكىمەت ەلىشىلىك قۇندىلىقتى ارتتىرۋ جانە وتاندىق ءوندىرىستى دامىتۋ جونىندەگى شارالار كەشەنىن دايىنداپ جاتقانىن ايتتى.