«بايتەرەك» حولدينگىنە جاڭا باسشى تاعايىندالدى

ق ر پرەمەر-مينيسترى ءاليحان سمايىلوۆ «بايتەرەك» ۇلتتىق باسقارۋشى حولدينگىنىڭ ۇجىمىنا جاڭا باسشى نۇرلان بايبازاروۆتى تانىستىردى.

نۇرلان بايبازاروۆ مەملەكەتتىك قىزمەتتە دە، كۆازيمەملەكەتتىك سەكتوردا دا جاۋاپتى قىزمەتتەر اتقاردى. اتاپ ايتقاندا، قارجى جانە ۇلتتىق ەكونوميكا مينيسترلىكتەرىندە، «قازاقستان تەمىر جولى» جانە «قازمۇنايگاز» ۇلتتىق كومپانيالارىندا، ونەركاسىپتى دامىتۋ قورىندا جۇمىس ىستەدى. بىلتىرعى قاراشادان باستاپ ول قازاقستان دامۋ بانكىندە باسقارما ءتوراعاسى بولدى، دەپ حابارلايدى Almaty-akshamy.kz Primeminister.kz سايتىنا سىلتەمە جاساپ.

ءاليحان سمايىلوۆ مەملەكەت باسشىسى حالىققا جولداۋىندا «بايتەرەك» حولدينگىنىڭ قىزمەتىن ترانسفورماسيالاۋ جانە اۋقىمدى سيفرلاندىرۋ بويىنشا مىندەت قويعانىن ەسكە سالدى.

«ناتيجەسىندە بيۋروكراتيالىق كەدەرگىلەر جويىلىپ، وتىنىمدەردى قاراۋ مەرزىمى قىسقارىپ، بيزنەس قاۋىمداستىعىنىڭ قولداۋ شارالارى تۋرالى حاباردار بولۋ دەڭگەيى ارتۋى قاجەت. جاڭا باسشى الداعى جوسپارلاردىڭ ورىندالۋىن قامتاماسىز ەتۋى ءتيىس»، — دەدى پرەمەر-مينيستر.

سونىمەن قاتار ول «بايتەرەك» باسەكەگە قابىلەتتى بيزنەستى دامىتۋ، حالىقتى قولجەتىمدى باسپانامەن قامتاماسىز ەتۋ جانە رەسپۋبليكانىڭ ازىق-تۇلىك قاۋىپسىزدىگىن نىعايتۋ بويىنشا جۇمىستاردى كۇشەيتۋى قاجەت دەپ اتاپ ءوتتى. 

قورىتىندىلاي كەلە، پرەمەر-مينيستر حولدينگ ۇجىمىنا جۇكتەلگەن بارلىق مىندەتتەردى شەشۋدە تابىستى جۇمىس تىلەدى.