وسىدان ءبىر جارىم جىل بۇرىن «بايتاق» جاسىلدار پارتياسى ءتوراعاسى ازاماتحان سايلاۋ ۇلىنىڭ تىكەلەي تاپسىرماسىمەن عىلىمي-ساراپتامالىق جۇمىس توبى قۇرىلىپ، الەمدەگى ەڭ وزىق ءارى ءتيىمدى اتوم ەلەكتر ستانسيالارىن زەرتتەۋ جۇمىستارىن باستاعان ەدى. توپتىڭ نەگىزگى مىندەتى – اەس-تىڭ ەكولوگيالىق قاۋىپسىزدىگى مەن ەلىمىزدىڭ ەنەرگەتيكالىق تاۋەلسىزدىگىن قامتاماسىز ەتەتىن رەاكتورلار مەن باسقارۋ تەحنولوگيالارىنا عىلىمي تۇرعىدا باعا بەرۋ بولدى.
ەندى وسى زەرتتەۋلەردىڭ ناتيجەلەرىن حالىققا ەگجەي-تەگجەيلى جەتكىزەتىن كۇن دە كەلدى. 6 قازان كۇنى وتەتىن رەفەرەندۋمنىڭ تاقىرىبى دا ەرەكشە ماڭىزعا يە. حالىق بولىپ وسى ماڭىزدى شەشىمدى قابىلداۋ ارقىلى بولاشاعىمىزدىڭ جارقىن بولۋى ءۇشىن جاۋاپكەرشىلىكتى تەڭ بولىسەتىن ۋاقىت جەتتى.
سىر وڭىرىنە كەلگەن رەسپۋبليكالىق حالىقتىق شتابتىڭ وكىلدەرى، ق ر پارلامەنتى ءماجىلىسىنىڭ دەپۋتاتى مارحاببات جايىمبەت ۇلى، «بايتاق» پارتياسىنىڭ اتقارۋشى حاتشىسى نۇرلان بولات ۇلى جانە ءوڭىردىڭ ءبىر توپ ازاماتتارى جاڭاقورعان اۋدانىنىڭ جاستارى جانە ەڭبەك ۇجىمدارىمەن كەزدەستى. سونىمەن قاتار، اۋداننىڭ وڭالتۋ ورتالىعى، ۋران تاسىمالداۋشى جاڭاقورعان ءترانزيتى، الما باعى شارۋاشىلىقتارى جانە جان-اراي شيپاجايى سەكىلدى اۋداننىڭ ماڭىزدى نىساندارىندا بولدى.
اۋداننىڭ نەگىزگى كاسىپكەرلەرى مەن ەڭبەك ۇجىمدارىنىڭ قىزمەتكەرلەرى الداعى رەفەرەندۋمدا اەس سالۋدى ءبىراۋىزدان قولدايتىندارىن جەتكىزدى. ولار بۇل شەشىمدى ەلىمىزدىڭ دامۋىنا قاجەتتى ءارى ۋاقىتىلى قابىلدانعان ماڭىزدى ساياسي قادام رەتىندە قابىلداپ وتىر.