بايقوڭىردان اقپان ايىندا ءۇش كەمە ۇشىرىلادى

قازاقستان تاراپى ۇشىرۋدىڭ جىلدىق جوسپارىن بەكىتتى.

«بايقوڭىر» عارىش ايلاعىنداعى ۇشىرۋ جۇمىستارى اقپان ايىندا باستالادى، دەپ حابارلايدى Almaty-akshamy.kz قازاقپاراتقا سىلتەمە جاساپ.

بۇعان دەيىن حابارلاعانىمىزداي، بايقوڭىر عارىش ايلاعىندا حعس قۇرامىنداعى «سويۋز مس-22» عارىش كەمەسىندەگى 2022 جىلعى 15 جەلتوقسانداعى شتاتتان تىس جاعدايعا بايلانىستى 2023 جىلعى سوڭعى ۇشىرۋ جوسپارى وزگەرتىلگەن ەدى.

«قازىرگى ۋاقىتتا قازاقستان تاراپى ۇشىرۋدىڭ جىلدىق جوسپارىن بەكىتتى جانە ۇشىرۋ باعدارلاماسى اقپان ايىندا باستالادى»، - دەپ مالىمدەدى ق ر سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنىڭ اەروعارىش كوميتەتى.

ەلەكترو-ل عارىش اپپاراتىمەن «پروتون-م» زىمىران تاسىمالداعىشىن ۇشىرۋ اقپان ايىنىڭ باسىنا جوسپارلانعان. س.ا. لاۆوچكين اتىنداعى عىلىمي-وندىرىستىك بىرلەستىكتە ازىرلەنگەن «ەلەكترو-ل» گەوستاسيونارلىق عارىش اپپاراتى 2022 جىلعى 27 جەلتوقساندا بايقوڭىر عارىش ايلاعىنا جەتكىزىلدى.

ۇشىرۋ جوسپارىندا جاريالانعان «سويۋز-2.1 ا» زىمىران تاسىمالداعىشىنىڭ «پروگرەسس مس-22» كولىكتىك جۇك كەمەسىمەن ۇشىرىلۋى اقپان ايىنىڭ ءبىرىنشى ونكۇندىگىنە بەلگىلەنگەن.

سونداي-اق «سويۋز مس-23» كولىكتىك باسقارىلاتىن كەمەسى بار «سويۋز-2.1 ا» زىمىران تاسىمالداعىشى 2023 جىلعى 20 اقپاندا حالىقارالىق عارىش ستانسياسىنا جىبەرىلەدى.