كەشە VII Baiqonyr International Short Film Festival-دىڭ شىمىلدىعى سالتاناتتى تۇردە اشىلدى. «Baiqonyr» – قازاقستانداعى تۇڭعىش حالىقارالىق قىسقامەتراجدى فيلمدەر كينوفەستيۆالى. ول جەتى جىلدان بەرى جاس كينەماتوگرافيستەرگە قولداۋ كورسەتىپ كەلەدى جانە قازاقستاندا عانا ەمەس، جاقىن جانە الىس شەتەلدەردىڭ ونداعان ەلىندە دە جاڭا ەسىمدەردى تانىتۋدا.
فەستيۆال جىلدىڭ كوپتەن كۇتكەن پرەمەرالارىنىڭ ءبىرى – ۇلتتىق كينونى قولداۋ مەملەكەتتىك ورتالىعىنىڭ قارجىلاي قولداۋىمەن Aray Media Group كومپانياسى تۇسىرگەن «دوس-مۇقاسان» كينوتۋىندىسىمەن اشىلدى. اتالمىش ءفيلمنىڭ رەجيسسەرى – ايدىن ساحامان.
وسى تاقىرىپقا وراي كەشە كينوگەرلەر باسپا ءسوز ءماسليحاتىن وتكىزگەن بولاتىن. «ءبىزدىڭ ءفيلمنىڭ العاشقى رەسمي كورسەتىلىمى وسىنداي كەرەمەت كينوفەستيۆالدىڭ اياسىندا بولاتىنىنا قۋانىشتىمىز. «بايقوڭىر» – بۇل جاڭا ەسىمدەردى اشاتىن جانە قازاقستاننىڭ شىعارماشىل جاستارىنا قولداۋ كورسەتەتىن فەستيۆال. ءبىز ءۇشىن بۇل وتە ماڭىزدى. سەبەبى، «دوس-مۇقاسان» توبىنىڭ شىعارماشىلىعى دا ستۋدەنت كەزدەن باستاۋ الدى. جاستىق شاق – شىعارماشىلىق ءۇشىن تاماشا كەزەڭ جانە ءبىزدىڭ فيلم وسى جاس ۇرپاققا جاقسى كورسەتكىش بولادى دەپ سەنەمىز»، – دەپ اتاپ ءوتتى «دوس-مۇقاسان» ءفيلمىنىڭ باس پروديۋسەرى ايگۇل بايبەك.
فەستيۆال باعدارلاماسىنا ۇكقمو-عى قولداۋ كورسەتكەن تاعى ءتورت فيلم ەندى. ۇلتتىق بايقاۋعا بەگالى شيبىكەيەۆتىڭ «قۇس» قىسقامەتراجدى ءفيلمى، ال ديلشات ءراحماتۋلليننىڭ «بەسىك جىرى» تۋىندىسى انيماسيالىق بايقاۋعا قاتىسادى. ال تاعى ەكى كارتينا كونكۋرستان تىس باعدارلاما اياسىندا كورسەتىلەتىن بولادى: ولار رەجيسسەر-انيماتور يۆان ارداشوۆتىڭ «كەنجە قىز» انيماسيالىق سەريالى جانە Generation سەكسياسىندا بەرلين حالىقارالىق كينوفەستيۆالىنىڭ گران-پري يەگەرى فارحات ءشارىپوۆتىڭ «سحەما» اتتى ءفيلمى. بۇل فيلمدەر كورەرمەندەرگە تمد ەلدەرىنىڭ كينوتانۋشىلارى مەن سىنشىلارىنىڭ فورۋمى بارىسىندا كورسەتىلەتىن بولادى.
فورۋم سەرىكتەستەرى AlmaU مەديا جانە كينو مەكتەبى جانە قازاقستاننىڭ كينوسىنشىلار قاۋىمداستىعى بولىپ تابىلادى. ولار فەستيۆال جۇمىسى بارىسىندا ءوزىنىڭ جىل سايىنعى «سىنشىلار تاڭداۋى» سىيلىعىن تابىستايدى.
– قازاقستان كينوسىنشىلار قاۋىمداستىعى 2015 جىلى قۇرىلدى. ونىڭ قۇرامىنا ون التى وتاندىق كينوسىنشى مەن كينوتانۋشى كىرەدى. بيىل «سىنشىلار تاڭداۋى» سىيلىعى 2020-2021 جىلدارى شىعارىلعان قازاقستاندىق فيلمدەرگە 13 نوميناسيا بويىنشا بەرىلەدى، سەبەبى پاندەمياعا بايلانىستى سىيلىق ءبىر جىل بەرىلمەدى، – دەيدى قاۋىمداستىق پرەزيدەنتى، ونەرتانۋ دوكتورى گۇلنار ابىكەيەۆا.
فەستيۆالدىڭ كونكۋرستىق باعدارلاماسىنا قاتىسۋعا بارلىعى 306 كينوجوبا ۇمىتكەر بولدى. ونىڭ ىشىندە باعدارلامالىق قىزمەت جەتى ەلدەن: قازاقستان، وزبەكستان، قىرعىزستان، ازەربايجان، تاجىكستان، ارمەنيا جانە رەسەيدەن 48 ءفيلمدى ىرىكتەپ الدى. ءۇش كونكۋرستا – حالىقارالىق، ۇلتتىق جانە انيماسيالىق بايقاۋلاردا ۇسىنىلعان كارتينالاردى بەدەلدى كينوەكسپەرتتەردەن قۇرالعان قازىلار القاسىنىڭ ءۇش كومانداسى باعالايتىن بولادى. حالىقارالىق بايقاۋدىڭ قازىلار القاسىن گۇلنار ابىكەيەۆا باسقارادى. ۇلتتىق بايقاۋدىڭ قازىلار القاسىنىڭ ءتوراعاسى ساحا رەسپۋبليكاسىنىڭ تانىمال رەجيسسەرى ەدۋارد نوۆيكوۆ. ال انيماسيالىق بايقاۋدىڭ قازىلار القاسىنىڭ جۇمىسىن باتۋميدەگى (گرۋزيا) Tofuzi حالىقارالىق انيماسيا فەستيۆالىنىڭ ديرەكتورى زۋراب دياساميدزە باسقارادى.
– بيىل فەستيۆال باعدارلاماسىنا ءبىز اتاقتى كينوتانۋشىلاردىڭ دارىستەرى مەن بەلگىلى رەجيسسەردىڭ شەبەرلىك ساباعىن ەنگىزدىك. ءبىزدىڭ ساراپشىلار كۇن سايىن بايقاۋ باعدارلاماسىنىڭ فيلمدەرىن، سونداي-اق كونكۋرستان تىس كورسەتەتىن فيلمدەردى، مىسالى، «قانتار» ارنايى باعدارلاماسىنا ەنگىزىلگەن تۋىندىلاردى تالقىلايدى، – دەيدى كينوفەستيۆال پرەزيدەنتى ءانۋار كەنجەبايەۆ. سونداي-اق، فەستيۆالگە وسى جىلى قىرعىزستاننان «ەكسپەديسيا» قوزعالىسىنىڭ وكىلدەرى كەلەدى. بۇل قوزعالىس ءوز ەلىنىڭ بۇگىنگى ءومىرى تۋرالى قىسقا مەتراجدى فيلمدەر تۇسىرەتىن 50-گە جۋىق رەجيسسەردى بىرىكتىرەدى.
«بايقوڭىر» 11 قىركۇيەكتە دارەجان ومىربايەۆتىڭ «سوڭعى سەانس» اتتى ءفيلمىنىڭ كورسەتىلىمىمەن اياقتالادى. ونىڭ الەمدىك پرەمەراسى لوكارنوداعى (شۆەيساريا) 75ء-شى مەرەيتويلىق فەستيۆالدە ءوتتى.
ءداستۇرلى تۇردە Baiqonyr فەستيۆالىنىڭ ۇيىمداستىرۋشىسى ەلىمىزدىڭ جەتەكشى كينوپورتالى – «برودۆەي» (brod.kz). فەستيۆال تمد-عا قاتىسۋشى مەملەكەتتەردىڭ مەملەكەتارالىق گۋمانيتارلىق ىنتىماقتاستىق قورىنىڭ قولداۋىمەن وتەدى. اقپاراتتىق قولداۋدى «Kazakh Tourism» ۇلتتىق كومپانياسى» اق كورسەتەدى.
فەستيۆالدىڭ اقپاراتتىق سەرىكتەستەرى – «حابار» جانە El Arna تەلەارنالارى، «جۇلدىز FM» جانە «ەلدوراديو الماتى» راديوستانسيالارى، Tengrinews.kz، Massaget.kz، Baribar.kz، 365 Info.kz، «ەكسپرەسس ك» ينتەرنەت پورتالدارى، Egemen Qazaqstan، «كازاحستانسكايا پراۆدا»، Almaty Aqshamy، «ۆەچەرنيي الماتى» جانە «كومسومولسكايا پراۆدا كازاحستان» باسىلىمدارى.